Ang pagtipi ni Atty. Ungab

Makapakurat kining nahitabo ni Atty. Jonah John Ungab, vice mayor sa lungsod sa Ronda, Cebu kinsa kagahapon giambus-patay sa S. Osmena Street, North Reclamation Area, dakbayan sa Sugbo. Si Ungab, ang abogado sa suspetsadong drug lord nga si Kerwin Espinosa, gikan pa lang sa ilang hearing sa Qimonda IT Center, Cebu City Courthouse mga alas 11 sa buntag dihang giatngan kini sa duha ka wa mailhing mamumuno. Kuyog siya sa iyang asawa atol sa maong hitabo.

Wa pa man tuoy mga suspek o gidudahan nga may kalabutan sa linuog nga kamatayon apan kita nasayod nga daghang anggulo nga angay palawman sa pagsusi na unya niini.

Kini tungod kay sagad sa iyang mga gipanghuptan nga mga kaso naglambigit man og high profile nga kliyente.

Gawas sa pamilyang Espinosa, si Ungab nahimo usab nga legal counsel sa laing Sugboanong drug lord nga si Alvaro “Barok” Alvaro kinsa mi-surrender ug anaa na karon sa Cebu Provincial Detention and Rehabilitation Center (CPDRC).

Nabaniog na usab nga sagad sa mga kaso ni Espinosa nga iyang gihuptan nanga-dismiss ilabi na niadtong 2009 diin si Espinosa nabilanggo pa sa New Bilibid Prison sa Muntinlupa City.

Niadtong tuig 2016, si Ungab, nga pag-umangkon ra usab ni Ronda Mayor Mariano Blanco III, nalakip usab sa mga gipanghinganlan ni Presidente Rodrigo Duterte nga mga pulitikong gialegahan nga nagprotehir sa mga tigpayuhot sa gidiling drugas.

Dili pa man tuod matumbok ang motibo, apan ang pagpatay kaniya nga nahitabo sa adlawng tutok naghatag og laing kahulogan ug pasidaan ngadto sa publiko.

Kon kini yanong nahitabo ngadto sa usa ka abogado ug usa usab ka bise mayor sa lungsod, unsa pa kaha ngadto sa uban o sa mga ordinaryong tawo?

Buot ipasabot wala nay siguridad ang atong kinabuhi.