Dunay nagpaluyo ni Basamot?

Gubot? Kon ang balita sa pamantalaan ang basihan morag dunay dako nga kagubot ang pundok sa PDP-Laban dinhi sa dakbayan sa Sugbo. Apan ang mga dagko sa PDP-Laban moingon man lang way problema.

Ang hinungdan sa giingon nga duha na ka pundok sa PDP-Laban dinhi sa dakbayan sa Sugbo tungod sa gi-post sa Facebook ni kanhi Kamputhaw barangay captain Lorenzo Basamot, nga natudlo siya nga bise presidente sa PDP-Laban Cebu city chapter.

Ang pundok nila ni Jojo Dizon, PDP-Laban provincial president, mialma nga si Cebu City Vice Mayor Edgar Labella gitudlo nga chairman dinhi sa PDP-Laban Cebu city chapter human siya mihurar ni Speaker Bebot Alvarez, secretary-general sa PDP-Laban, niadtong Nobiyembre 2017.

Misamot ang isyu dihang miingon si Jojo Dizon nga si Lorna Roa Bacalla ang gitamod nga presidente sa PDP-Laban, Cebu city chapter. In fairness, si Vice Mayor Labella wa man nangayo sa posisyon.

Apan alang kang Vice Mayor Labella wa siyay problema kay iya man kaila ug silingan ang mag-asawa nga Lorna ug Alexander Bacalla. Gani, miingon si Labella nga mangutana pa siya ni Speaker Alvarez ning maong isyu.

Unsa man gyud ang nagpaluyo nga rason sa pagsulbong ani nga isyu? Duna bay pulitiko nga nagpaluyo ni Basamot?

Matod pa si Basamot sakop kaniadto sa BOPK unya nitapon sa Team Rama sa panahon nga si Mike Rama ang mayor sa dakbayan sa Sugbo. Dihang nasuko, matod pa, si Mike Rama wa suportahi si Basamot sa iyang pagdagan pagka kapitan.

Ang isyu nga gilabay sa pundok nila ni Vice Mayor Labella, lakip na ang mga oposisyon nga konsehal nga kaniadto sakop sa partido UNA, nga wa sila moagi og seminar sa PDP-Laban.

Wa man gilimod ug gilalis nga pundok nila ni Bacalla sa PDP-Laban naorganisar sa wa pa ang piliay niadtong tuig 2016. Apan nakahibawo ta nga ang pundok ni Vice Mayor Labella giimbitar man nga magpasakop sa PDP-Laban. Sa ato pa, dili angayan nga ikasuko o pangigi kon gihatagan sila og pagtagad ni Speaker Alvarez.

Di malalis nga pagpost ni Basamot sa Facebook sa iyang appointment nga vice president siya sa PDP-Laban Cebu city chapter usa ka pag-intriga. Wa ta moingon nga dunay pulitiko dinhi sa dakbayan sa Sugbo nga nagsugo ni Basamot aron magkaguliyang ang pundok ni Vice Mayor Labella.

Ang duwa sa pulitika duwa sa yawa, pung pa ni anhing Mano Amon Durano. Kon magkagubot ang pundok ni Vice Mayor Labella, nga mogawas nga mora sila og land grabber o di ba kaha skwater sa PDP-Laban, dunay usa ka pulitiko nga mabulahan.

Kon kinsa man o duna man kahay nagpaluyo ni Basamot aron magubot ang pundok sa PDP-Laban dinhi sa dakbayan sa Sugbo, dinhi atong makita nga wa nga gyud ayo ang sistema sa atong pulitika. Hinuon, di na man bag-o kanang giingon nga “divide and rule” nga pamaagi sa pulitika.

Nasuko ko atong taga PIB nga didto ba unya nagpataka man na og panakop. Unsa may business nila nga moanha og station? Moanha sa Malabuyoc nga wa may basis ang ilang pagdakop,”

- Malabuyoc Mayor Narciso Creus

Nakalingkod nana siya and he was proven to be incompetent, mao bitaw giilisan siya so, karon gibalik na pud siya,”

- Atty. Innocencio de la Cerna, abogado sa mga piniriso sa CPDRC.