Looking through the eyes of love
Malipayon ko nga mipauli. Gabii na sa akong pag-abot sa among balay. Naabtan ko sila si Mama ug Papa nga nag-estoryahay sa sala. Miamen ko nila. Unya nagkanta-kanta kong misulod sa akong kuwarto. Wa na ko mogawas kay mihigda na man ko human makailis og para sa balay. Di na ko manihapon kay nangaon na man mi si Divina sa gawas.
Dugay kong nakatulog. Si Jake ra ang akong gihunahuna. Husto si Divina, di ko isipon nga nanghambog si Jake nako. Di lang gyud tingali siya makapadayag sa iyang love nako maong gipaagi na lang niya sa pagpanghambog ang tanan aron duna siyay ikasulti nako. Haaay! Kanindot unta kon boyfriend ko na si Jake. Hilom kong nakaingon. Dugay na kong naibog niya sukad lang kami nagkaila usa ana ka higayon nga gidala ko nila ni Mama ug Papa sa ilang balay kay dunay party. Sukad niadtong higayona di na siya mawala sa akong hunahuna.
Ug mao na l ay akong nabatyagan nga hilom na diay kong na-in-love kang Jake.
Pagka ugma kay Lunes man, nagkadungan mig gawas si Jake sa gipuy-an namong subdivision. Wa ko mosakay sa awto nila ni Mama ug Papa, ingon man sab si Jake wa mosakay sa awto sa iyang Mama. Usually gud, ihatod ko nila ni Mama ug Papa sa ilang awto sa university nga akong gitunghaan sa di pa sila mangadto sa tagsa-tagsa ka opisina nga ilang gitrabahoan sa siyudad.
Ug si Jake sab mosakay sa awto sa iyang Mama ug ihatod sab siya sa university nga iyang gieskuwelahan sa di pa moadto ang iyang mother sa gitrabahoang kumpaniya isip maoy presidente.
“Good morning, Beth!” Nindot kaayog pinahiyoman si Jake nako. Aw, gibaslan ko sab siya sa pina-cute kong smile uban ang madaniho kong kidhat.
“Good morning sab, Jake.” “Kanindot kaha, no, Beth, kon duna na koy brand new nga sports car? Ihatod gyud tika kanunay sa imong gitunghaan.”
Sus, mitukar na sab ang kahambugero sa karaho! Hilom kong nakaingon. Milingiw ko kay di ko gustong makakita si Jake sa akong nawong nga nagkusmod. Ang kanahan, dako kaayog katawa. Nahimuot gyud siya sa iyang pagpanghambog. Morag gusto ko siyang biyaan.