Abueva, Tratters suprisang gibalik sa Gilas Pilipinas lineup ni Reyes

Human sa kontrobersiya nga pamahayag, gibalik ni Gilas-Pilipinas coach Chot Reyes si Calvin Abueva sa iyang original lineup. Kini tungod sa iyang tinguha nga langkuban og baskug ug paspas nga mga guard ang Pilipinas lineup aron kini makasugakod sa mga tag-as nga Australia sa second window sa 2019 Fiba World Cup qualfiers.

Sama sa naandan, si Reyes migamit sa iyang personal Twitter page sa pag anunsyo sa 14 ka mga players nga iyang gilakip sa team nga adunay walo ka guards ug unom ka mga big men ug ang gikasurprisa mao ang pagkuha sa frontliner sa kanhi La Salle nga si Abu Tratter.

Si Abueva, gi-dropped na unta ni Reyes human wala kini makatunga sa iyang unang tulo ka praktis, apan iya kining giku- ha og balik aron maoy makauban nila ni Carl Bryan Cruz, Japeth Aguilar, June Mar Fajardo, Tratter ug Andray Blatche sa frontline nga mahulagway mubo ra kon itandi sa Australia.

Gipasabot ni Reyes nga dili malakip si Troy Rosario tungod kay wala pa kini clearance gikan sa doktor human kini matagak sa ilang duwa samtang si Mac Belo dili pa usab siyento por siyento sa iyang kondisyon.

Ang mokompleto sa backcourt sa Gilas alang sa ilang duwa karong Pebrero 22 batok sa Australia ug sa Pebrero 25 batok sa Japan mao sila si Jayson Castro, Kiefer Ravena, Kevin Alas, Jio Jalalon, RR Pogoy, Matthew Wright, Allein Maliksi ug Gabe Norwood.

Ang team milupad na kagahapon paingon sa Australia.

Si Tratter hinuon nakasugod gyud sa pagpraktis sa Gilas sukad pa sa niaging semana.