Nietes nalipay nga Gonzalez midawat sa iyang hagit
Gihangop ni International Boxing Federation (IBF) world flyweight champion
Donnie “Ahas” Nietes ang pagdawat sa kampo ni kanhi four-time world champion
Roman “Chocolatito” Gonzalez sa iyang hagit alang sa usa ka world title fight.
“Ok mas maayu kay ni uyon siya sa akong hagit. Basta aku andam ko mo away sa mga champion sa 115 lbs.,” matod ni Nietes sa dihang gikuhaan og reaksiyon human mipabuhagay ang kampo ni Gonzalez nga gusto silang moaway sa kasamtangang IBF champion.
Sa niaging adlaw, si Enrique Armas, ang vice-mayor sa Managua, Nicaragua nga maoy naggiya sa boxing career ni Gonzalez mipabuhagay nga interesado silang moaway ni Nietes alang sa bakanting World Boxing Organization (WBO) 115 lbs. title.
Mismong ang presidente sa WBO nga si Francisco Valcarcel maoy gisultihan ni Armas atol sa ilang panagtagbo sa niaging semana.
Nabakante ang maong titulo human misaka ngadto sa laing timbang ang kampiyon niini nga si Naoya Inoue sa Japan.
Si Nietes (40-1-4) anaa na sa katapusang hut-ong sa iyang ensayo alang sa iyang pagdepensa sa 112 lbs. title batok ni Juan Carlos Reveco sa Argentina karong Pebrero 24 didto sa The Forum sa Inglewood, California.
“Anytime, puwede ko mosaka sa 115 lbs,” dugang ni Nietes.
Si Gonzalez, ang kanhi found-for-pound king, adunay 46-2 nga baraha, duha sa iyang kapildihan iyang naangkon sa mga kamot ni Srisaket Sor Rungvisa sa niaging tuig.
Kon kahinumdoman, si Nietes nihagit ni Gonzalez alang sa usa ka world title fight apan niadtong higayona wa modawat si Gonzalez ug nakig-away kini kang Brian Viloria.