JAMES MIAGAK SA TEAM LEBRON
Rally sa 4th quarter mitipi sa team ni Stephen Curry
Gipamatud-an ni LeBron James nga siya ang hari sa basketball pinaagi sa pag-agak sa iyang gipormang puwersa nga Team LeBron ngadto sa 148-145 nga kadaugan batok sa Team Stephen kagahapon sa National Basketball Association (NBA) 2018 AllStar Game sa Staples Center sa Los Angeles, USA.
Ang pambatong forward sa Cleveland Cavaliers nagpakatap og 29 puntos lakip na niini ang duha ka mga puntos sa nahabiling 34.5 segundos nga nagtukmod sa Team LeBron sa kadaugan.
Sa labing unang higayon sa 67 ka mga edisyon sukad gipahigayon ang All-Star Game, ang NBA ningpapha sa tradisyunal nga East-West format nga gisugdan paggamit niadtong 1951.
Ning higayuna, ang nakahakot sa labing daghang mga boto alang sa All-Star Game nga sila si James ug Stephen Curry sa Golden State Warrios mao ang gitahasan sa pagporma og tagsatagsa nila ka team.
Giusab ang format ning panagsangka sa labing maayong mga basketbolista sa kalibutan sa tinguha nga mawagtang ang konsepto nga duwaduwa lang ang tanan ning kombatiha.
Nagpabilin man tuod ang lingaw apan ning higayuna, mas hugot na ang depensa sa duha ka mga kampo hilabi na sa krusyal nga bahin.
Sa katapusang posisyon sa bola, gipayungan pagdepensa nila ni James ug Kevin Durant si Stephen Curry aron dili makaitsa sa three-point area ang two-time MVP nga mao unta’y makapatabla sa duwa.
“I think myself and Stephen took it upon ourselves when we took on this format that we had to change the way this game was played,” matod ni James, four-time MVP.
Ang Team LeBron ming-rally gikan sa dobleng numero nga pagkalubong hangtod nga ilang natabla ang sangka, 144144, pinaagi sa three-point shot ni James sa nahabiling 1:31 minutos.
Nakapasulod og usa ka freethrow si DeMar DeRozan aron ihatag pagbalik sa Team Stephen ang labaw, 145-144. Ang layup ni James maoy nakahatag sa Team LeBron og 146-145 na labaw.
Sa return play, nakamugna og turnover si DeRozan unya napasulod ni Russell Westbrook ang iyang layup sa nahabiling 10.7 segundos.
Human niini, ang Team Stephen tatawng nangita kang Curry aron makapabuto og three-point bomb apan napakgang kini sa depensa nila ni James ug Durant.
Ang kanhi four-time MVP nga si James, kinsa nagpakatap sab og 10 rebounds ug walo ka mga assists, maoy napiling MVP sa duwa.
Kini maoy ikatulong higayon nga nahimong All-Star MVP si James ug nahilakip na siya sa tapok nila ni Bob Petit (upat), Kobe Bryant (upat), Oscar Robertson (tulo), Michael Jordan (tulo) ug Shaquille O’Neal (tulo).
Puntos matag usa
Team LeBron (148)- James 29, Durant 19, George 16, Beal 14, Irving 13, Davis 12, Westbrook 11, Walker 11, Dragic 2
Team Stephen (145)- DeRozan 21, Lillard 21, Embiid 19, Towns 17, Antetokounmpo 16, Thompson 15, Harden 12, Curry 11, Horford 6, Lowry 4, Green 3.