SAKSI NAKAKITA SA DAGWAY SA KILLER NI UNGAB
Tulo gihapon ka mga anggulo ang gisubay sa Cebu City Police Office sa pagbanhig patay kang Ronda Vice Mayor Jonnah John Ungab. Kini mao ang personal, may kalabotan sa iyang trabaho ug pulitika.
Duna nay saksi nga nakakita sa dagway gunman ug nasuta usab sa CCTV footage nga makita ang dagway niini, apan gikinahanglan nga ipaklaro o ipatin-aw kini.
Ilang gisubay ang mga kaso nga gipanghawiran ni Ungab nga matawag nila nga critical apan wa usab nila wad-a ang pulitika nga dunay posibling nasuko kaniya.
Matod ni Sr. Insp. Jonathan Taneo, hepe sa Homicide section nga mao usab ang information officer sa task force Ungab, nga naa pa sila sa katunga sa ilang imbestigasyon.
“Nag build up pa ta basta sa pagkakaron naa pa ta sa 50 percent sa progress sa atong investigation,” matod ni Taneo. Wala pa usab nakig-alayon kanila ang pamilya ilabi na sa asawa niini nga maoy kauban ni Ungab sa sakyanan sa dihang nahitabo ang pagpamanhig.
Duna na silay gipangdudahan, apan wa pa silay igong ebidensya nga makatumbok kanila nga maoy nagpatay.
GIHULGA
Nakadawat usab og kasayuran ang Task Force Ungab nga dunay hulga sa kinabuhi ang abogado.
Makig-alayon sila sa PNP Cyber Crime Group 7 nga giingong didto nagpatala si Ungab aron mahatagan sila og kahayag sa ilang gihimo nga imbestigasyon.
Giingong niadto pang miaging tuig nakadawat og hulga si Ungab nga maoy ilang subayon unsa nga klase sa pagpanghulga.
“Naa syay previous threat.
Noon pa nahitabo ang iyang
threat that’s why we will get the
records kon na-blotter ba ni sa mga stations. Ni-coordinate na pud ta sa Cyber Crime Group,” matod ni Supt. Ryan Devaras.
Atol sa pagkasikop ni Kerwin Espinosa, nalakip ang ngan ni Ungab nga usa sa iyang mga protektor sa negosyo sa illegal nga drugas, apan gihimakak kini sa abogado.
Ang hepe sa City Intelligence Branch Chief Insp. Christopher Navida mitug-an nga wala sa ilang listahan sa
high value target sa mga drug personalities si Ungab. Gitinguha karon sa task
force Ungab nga makuha nila ang cellular phone niini nga naa pa karon sa kabanay sa biktima sanglit nagtuo ang kapulisan nga naa silay makuha nga impormasyon.
Sa pagkakaron duha pa lang ang suspek nga ilang nakita base sa kuha sa CTTV camera sa Qimonda IT Center. apan wala pa nila masusi ang pagsulod ni Ungab sa korte.
SAKSI NAKAKITA
Usa sa mga saksi ang nagduha-duha pa usab nga mokooperar sa kapulisan sa kahadlok sa iyang siguridad, apan gipasalig sa kapulisan nga ila kining proteksyonan.
Ang saksi nakakita sa panagway sa gunman sa wala pa niini pusila sa makaduha ka higayon ang manlalaban.
Makita sa CCTV video ang dagway sa gunman, apan kinahanglan pa nila nga ipaklaro kini.
Sa pagkakaron sigon sa ilang nakita sa CCTV duha pa lang ang ilang nakita nga mipatay kang Ungab ang gun man ug ang driver sa getaway vehicle.
Giingong sa wala pa moagi ang sakyanan sa abogado duna pay gika-estorya sa telepono ang suspek nga gituohan nga maoy nag-tip sa nahimutangan ni Ungab.
Wa pa usab nila mahuman pag review ang video sama sa pagsulod ni Ungab sa korte ug sa posibling dunay tawo nga nagsunod-sunod niini.
Subayon usab nila ang ubang cctv camera nga gipang montar sa North Reclamation Area paingon sa syudad sa Mandaue nga maoy gidaganan sa duha ka suspek.
CHR MOIMBESTIGAR
Mohimo sa ilang kaugalingon nga imbestigasyon ang Commission on Human Rights (CHR) 7 sa pagpatay kang Ungab.
Matod ni CHR 7 Arvin Odron nga nimando ang central
office nila sa kaulohan nga imbestigahon ang pagpatay sa abogado sa drug lord nga si Kerwin Espinosa.
Dugang ni Odron nga kon mosugot ang pamilya ni Ungab, mopasaka og kaso ang CHR 7 batok sa suspek.