PULIS, PUSHER PATAY SA BUY-BUST
TARGET `GUN-FOR-HIRE’, MISUKOL SA MINGLA POLICE DIHANG NA-CORNER
Labing unang pulis sa Sugbo nakalas sa pagbalik sa Oplan Tokhang sa kapulisan human nisukol ang ilang target sa buybust operation niadtong Lunes sa hapon sa lungsod sa Minglanilla.
Ang kagamhanan sa lungsod nag-half-mast sa ilang bandila tungod sa hitabo samtang nisaad si Mayor Elanito Pena nga mohatag og hinabang pinansyal sa pamilya ni PO2 Evie Espina nga napusilan ni Jovilio Franza, taga Barangay Tulay, Minglanilla.
Si Franza gitumbok nang numero unong drug personality ug nabaniog nga usa ka gun-for-hire.
Ang armas nga gigamit ni Franza sa pagpusil kang Espina iya sa Philippine National Police ug kataposang na-isyu ngadto sa gibanhigang pulis nga si anhing SPO4 Razul Segismar.
Si Espina sakop sa Drug Enforcement Unit (DEU), kinsa gitakda untang ma-promote ngadto sa pagka PO3 karong tuiga.
Ang hepe sa kapulisan sa Minglanilla, Chief Inspector Verniño Noserale, niingon nga niadtong Lunes sa hapon mipahigayon sila og buy-bust operation batok kang Franza.
Apan giingong nakabantay si Franza kinsa kuyog sa iyang live-in partner.
Matod ni Noserale nga nahitabo ang ginukdanay ug sa dihang na-corner si Franza, diha na kini misugod sa pagpabuto.
Si Espina kinsa nagsul-ob og bullet proof vest, naigo sa ulo.
Sa dihang nibawos ang mga kauban ni Espina, napatay usab si Franza dihadiha.
Si Espina didto na makabsi sa kinabuhi sa tambalanan.
Matod ni Noserale nga sigun sa iyang nasayran, si Francia ilado sa Minglanilla nga usa ka gun-for-hire.
Nalambigit usab kini sa illegal nga drugas lakip na ang iyang live-in partner ug ang iyang anak.
Gianugonan si Noserale ni Espina, kinsa walo na ka tuig nga nadistino sa lungsod sa Minglanilla tungod kay gawas nga tarong, kugihan kini nga pagkapulis.
Iyang gihagit ang kapuyo sa ni Franza nga si Evangeline Briones nga mopatim-aw sa kapulisan ug atubangon ang ilang kaso nga ipasaka samtang ipamatuod ang pasangil nga gituyo pagpatay ang iyang kapuyo.
Nakuha gikan ni Franza ang usa ka 9mm pistol nga dunay duha ka nahabilin nga mga bala ug unom ka kabhang, usa ka dakong pakite sa gituohang shabu, duha ka medium ug 25 ka gagmay’ng pakite nga ang tanan gibana-bana nga mobalor og kapin sa P500,000.
Lakip sa nakuha ang usa ka motorsiklo nga dunay hand grenade sud sa u-box niini, cash nga P7,500 nga gituohang halin sa ilegal nga drugas.
Nakuha usab sa kapulisan ang .380 caliber nga pistola ug pito ka mga bala nga gituohan nga iya ni Briones, kinsa nakasibat sa operation uban sa anak ni Franza.
Ang armas nga gigamit ni Franza dunay tatak nga PNP ug base sa ilang gihimong pakisusi, kataposan kining giisyu ni Segismar, kinsa nadistino sa Oslob, apan taga lungsod sa Minglanilla.
Si Segismar gi-ambush niadtong Pebrero 14, 2015 ug giingong gikuha pa ang armas.
Gumikan niini, susihon sa kapulisan sa Minglanilla kon nganong naabot ni Franza ang armas sa maong pulis, kon aduna bay kalabotan sa pagbanhig.
Si Peña nibutyag nga dugay na nga tunog ang ngan ni Franza sa ilang lungsod.