MGA NASUNOGAN DILI PA MAKABALIK:DWUP
Dili pa makabalik ang gatusan ka mga residente sa sityo Beltran ug Yati sa Barangay Quiot, Cebu City human masunog ang ilang mga balay sa niaging adlaw.
Si Genevieve Alcoseba, pangulo sa Division for the Welfare of the Urban Poor (DWUP),nagkanayon nga adunay pending nga kaso batok sa homeowner association ug sa nangangkon nga tag-iya sa luna nga nasunogan.
Si Nagiel Bañacia, pangulo sa Local Disaster Risk Reduction and Management Office (LDRRMO), nagkanayon nga niabot ngadto sa 40 ka mga balay ang naugdaw nga gipuyan sa 66 ka pamilya kon 500 ka individual.
Si Barangay Kapitan Francis Esparis sa Quiot nagkanayon nga nabahin sa upat ka pundok ang mga nasunogan diin sila ni-ukopar sa barangay sports complex, bakanteng luna sa sityo Gruto, basketball court sa Sityo Yati ug duol sa chapel sa sityo Beltran.
Ang ubang pamilya wala mamiya sa lugar nga nasunogan sanglit nabalaka sila nga mawagtang ang ilang mga bu- tang nga nasalbar.
Matod ni Alcoseba, wala pa masulbad ang kaso tali sa homeowners ug giingong tagiya sa yuta nga gipanag-iya sa pamilyang Morales.
Gipadayag sa pangulo sa DWUP nga magobiyerno o mapribado ang maong luna, ilang irekomenda ang pagpatuman sa re-blocking aron dili na masubli ang sunog nga maoy ikaunom sukad nilingkod si Esparis isip pangulo sa barangay niadtong tuig 2013.
Dugang ni Alcoseba nga ilang pangitaan og win-win solution ang problema sa mga residente ug mohimo og lakang aron para makabalik ang mga residente pagtukod sa ilang mga bag-ong balay.
Usa sa sulbaron sa DWUP ug sa barangay council mao ang road-right-of-way nga gihulagway ni Alcoseba nga dakong problema ug usa sa hinungdan nganong wala dayon mapawong ang kayo sanglit naglisod ang mga bombero.
Si Mayor Tomas Osmeña nagkanayon nga personal siyang mohatag og mga tolda ngadto sa mga nasunogan samtang ang City Government sama sa naandan, mohatag og tag P20,000 nga financial assistance ngadto sa mga nasunogan.
Si Esparis nagpasalamat ngadto sa City Government sa tabang nga gitunol ngadto sa iyang mga residente nga maoy labaw nga nanginahanglan. Gibanabanang moabot ngadto sa P500,000 ang danyos sa maong sunog.
Ang kapitan nagdumili sa paghatag og komento kon makabalik ba o dili ang mga nasunogan.
“Wala man ta kadawat og instruction kabahin ana. Ang amo focus ra gyud mi unsaon nato pagtabang ning mga biktima. Luoy tawon kaayo ni sila. Di mi kaako nga mapasagdan ni namo. Kutob sa among mahimo, among buhaton,” padayag ni Esparis.