Pito ka mga Sugbuanong trekkers posibli nga mapriso og unom ka tuig

Posible nga mag-atubang og unom ka tuig nga pagkapriso ug multa nga P18 milyones ang pito ka mga trekker gikan sa dakbayan sa Sugbo nga maoy sad-an sa grass fire nga nahitabo sa Mt. Pulag Benguet sa nakalabay nga buwan.

Ang mga sad-an nailhan nga sila si Raymon Kristomar Dapat, 30; Juvelyn Dela Rey, 27; Febee Rose Alino, 27; Alvin Formentera, 26; Adonis Buaya, 32; Carlo Cabilao, 24; ug Lython Paul Quiñones, 31; mga residente sa Sugbo.

Subay niini nimando na usab si Department of Environment and Natural Resources (DENR) Secretary Roy Cimatu nga mohimo ang tagdumala sa Mt. Pulag National Park og lakang nga dili na mahitabo ba pagbalik ang maong grass fire.

Dugang ni Cimatu nga wala’y tubig ang maong dapit ug dali nga nikatag ang kayo tungod kay taas kini nga lugar.

Nimando na usab ni nga limitahan ang tawo nga makasulod sa maong dapit.

Sa pagkakaron temporaryo nga gisira una ang maong dapit aron malikayan ang susamang panghitabo.

Gipasaka na usab ang kaso nga kalapasan sa Presidential Decree 705 kun Forestry Reform Code of the Philippines batok sa pito ka trekker.

Nasayran nga P2.3 milyones ang kantidad sa 5.9 ektarya nga nasunog sa giila nga sea of clouds sa maong dapit.

Apan base sa Forest Code of the Philippines, nga i-multiply ka walo ang kantidad sa nasunog diin moabot kini sa P18.4 milyones.