Laing pulis sa Lapu positibo sa drug test; mihimakak nga user

Usa ka sakop sa Lapu-Lapu City Police Office (LCPO) ang nag-positibo sa gihimong drug test sa miaging buwan.

Kining maong pulis gidunggog na kaniadto nga tiggamitan og shabu.

Gipahibawo ni PSupt. Rey Tiempo, deputy chief for admin. sa LCPO, nga sa 35 ka mga pulis nga gipa-ubos sa surprise drug test niadtong Enero 29.

Gipugngan ang identity sa maong pulis nga nag-ranggo og P03 nga nagdestino sa City Mobile Force Company ug wa pay duha ka tuig nga na-assign sa LCPO human kini gibalhin gikan sa lalawigan sa Bohol.

“Gi-follow man gyud nato ang due process of law, especially he is a member of our organization sa PNP. So right there and then ato dayon siyang gipa-explain, why, nag-positive siya,” tipik sa pamahayag ni Tiempo.

Samtang si PCI. Mark Sucalit, hepe sa Intelligence Branch, midugang nga mihimakak ang maong personnel nga tiggamitan siya og shabu nga misukwahi sa chemistry report nga giluwatan sa Regional Crime Laboratory Office 7. Matod pa ni Sucalit nga gihatagan nila og 15 ka adlaw ang maong pulis nga makapadala sa iyang explanation letter nga magsalikway sa maong resulta ug sa samang higayon makapalimpiyo sa ilang pangalan.

Apan atol niining pagsuwat wa pay nadawat nga notisya ang mga opisyal.

Kasamtangan nga gipa-ubos sa camp restriction ang maong pulis ug dili na mamahimong mobalik sa iyang naandang assignment samtang ang nagpadayon ang investigation.

Sa higayon nga dili makahatag og makatagbaw nga pagpasabot ang naasoyng pulis hayan nga mahisama ang iyang dangatan sa na-unang pulis sa LCPO nga nagpositibo sab sa drugs niadtong 2016 nga na-dismiss sa serbisyo.

Ang drug tests tipik sa lakang sa paglimpyo sa hanay sa kapulisan.