Bise mayor Ungab nahisgutan ni Duterte?

Di man tingali sayop kon iapil sa imbestigasyon sa kapulisan ang anggulo sa kamatayon ni Atty. Jonah John Ungab, bise mayor sa lungsod sa Ronda ang paghisgot ni Presidente Rodrigo Duterte, kini usa sa narco politics.

Wa man mamasangil ang katawhan nga may kalambigitan ang seryusong kampanya ni Duterte batok sa illegal nga drugas.

Ilabi na nga nalitok sa baba ni Duterte sa pagbisita niini dinhi sa siyudad sa Sugbo, nga duna pay matumba gumikan sa problema sa illegal nga drugas dinhi.

Kay ang gitan-aw nga anggulo sa kapulisan sa ilang imbestigasyon pipila lang ka buok sa sama sa personal, pagka pulitiko ug abogado.

Ang tabi man gud nga nigawas ilabi na sa social media ang isyu sa problema sa illegal nga drugas.

Samot nga abogado si Ungab sa drug lord nga si Kerwin Espinosa, sa drug lord nga si Alvaro Alvaro alyas Barok ug uban pang nalambigit sa illegal nga drugas.

Giingon pa nga ang nagpatay ni Ungab, mga professional killer.

DAVIDE WA MAHADLOK Kon imong sabton wa mahadlok si Cebu Governor Jun Jun Davide, sa pahibawo sa gitangtang nga Congresswoman Gwen Garcia sa posibling pagdagan pagbalik sa pagka gobernador.

Sa ato pa , dunay kompyansa ug komportable si Davide, bisan pa man og si Garcia ang mahimong kaatbang.

Kalmado ra si Davide sa pagtubag pinaagi sa pag-abiabi sa giingon ni Gwen nga mobalik sa pagdagan homan ma-challenge sa nakab-ot nga hukom sa ombudsman sa pagtangtang kaniya sa katungdanan.

Ang Ombudsman nidesider nga sad-an si Garcia kay way pagtugot gikan sa hunta provincial sa Sugbo, ang pag-abuno ginamit ang filling material sa kontrobersyal nga Balili property sa Naga.

Si Davide nipildi sa mga igsuon ni Gwen nga sila si Pablo John Garcia ug Winston Garcia. Apan gipildi si Davide ni Gwen sa unang pagdagan niini sa pagka gobernador. Hinuon kaniadto si Davide, wa pa mailhi sa taga probinsya kay konsehal man kini sa siyudad sa Sugbo.

Samtang, si Gwen nahimong gobernador sud sa tulo ka termino nga way pildi. Gawas sa iyang pagka suspenso sa katapusan niining termino.

Sa pulitika ang bintaha anaa sa pulitiko nga way isyu sa korapsyon. Ang mabuot ug ma-alam nga botante mopili sa ligdong nga mga kandidato.