Kusog pay hagok sa pabuto

Daghan ang nagtuo nga kusog mobuto ang bomba nga gipanghambog ni Senador Antonio Trillanes III nga iyang pabuthon kaniadtong Lunes sa buntag sa dihang mitambong si Bong Go sa hearing sa Senado.

Bisan ako nga diha mismo sa sulod sa session hall sa Senado gibati og tumang kahinam samtang naghulat sa ipabuto ni Trillanes.

Sa dihang si Trillanes na ang gihatagan sa kahigayonan pagpangutana ni Bong Go, hilom paminawon ang Senado samtang naghulat sa bomba.

Apan naunsa bang pagka-unsaa.

Mas kusog pa man ang hagok sa anak ni Ondoy Roberto sa pabuto ni Trillanes.

Didto naka-sentro ang kontrobersiya sa sulat ni Defense Secretary Lorenzana ngadto sa gipalagpot nga si Rear Admiral Mercado diin dihay nasulat nga pangalan ni Bong Go.

Apan nahimong way hinungdan ang tanan sa dihang mismo si Mercado ang mideklarar nga wala manawag, makigkita o makigsulti si Bong Go kaniya kalabot sa plano pagpalit og frigate para sa Philippine Navy.

Napasabot usab ni Lorenzana og maayo ang gigikanan sa maong sulat.

Matod pa niya, dili si Bong Go mismo ang mihatag sa sulat kon dili, gidawat lang sa iyang opisina ang daghang mga sulat gikan sa Malakanyang og nagtuo siya nga gikan kadtong maong sulat kang Bong Go.

Tungod kay natubag na man kining tanang mga pangutana sa mga Senador nga nauna og pangutana kaniya, nawad-an na og bala si Trillanes batok kang Bong Go.

Nahimong taas ang panahon ni Trillanes sanglit gihatag man ni Senador Kilo Pangilinan kang Trillanes ang iyang 7 ka minuto nga pagpangutana.

Nakapagusto og pakita si Trillanes sa iyang Powerpoint presentation.

Apan ang nakaparat lang kay pulos mga teknikal ang maong mga butang unya wala nay kalabotan si Bong Go niini.

Tungod niini, makaduka na hinuon ang pabuto ni Trillanes sanglit didto na man siya sa isyo teknikal manghilabot.

Buyno, nakapagusto og batikos si Bong Go sa Philippine Daily Inquirer og sa Rappler sa mga balita niini nga walay gibasehan sama sa pag-apil apil kuno ni Bong Go sa kontrata sa Philippine Navy.

NIndot paminawon ang pabuto ni Senador Richard Gordon.

Matod pa ni Gordon, kini ang unang higayon nga mipalit ang Pilipinas og frigate nga ma-gamit sa pagpatrolya sa atong mga kadagatan.

Apan unsay nahitabo, matod pa niya.

Wala pa gani mapalit, giawayan na dayon. Gilisod-lisod ang pagpalit sa maong mga butang nga gamiton man unta kini alang sa seguridad sa nasod.

Mao pa gani pag-sugod, naglisod na kita pagtiwas, matod pa niya.

Kon naglisod pagpalit sa duha ka frigate, unsa na kaha kon dugangan pa kini sanglit matod pa ni Read Admiral Empedral, nagkihanglan ang nasod og 6 ka buok frigate nga barko, matod pa ni Gordon.