Looking through the eyes of love
Nagsugod na sab kog kalagot kng Jake. Unsaon man sab ning tawhana, uy, di man gyud makapugong sa pagpanghambog nako? Apan nahinumdom ko sa gisulti ni Divina nako. Di ko angay nga masuko kang Jake kon motukar ang iyang kahambugero kay duna man siyay rason nga manghambog. Labaw na nga nasabtan ko nga aron duna siyay ikabida sa iyang kaugalingon, bisan unsa na lang ang iyang ipanghambog nako.
Gingisihan ko si Jke. Gipaundayonan ko na lang siya sa iyang giingon.
“Bitaw, Jake, no? Nindot gyud kon duna ka nay sports car. Isakay gyud ko nimo pirme.”
“Molang. Ikaw gyud ang unang makasakay ani. But di man ko palitag dayon nilang Mama ug Papa kay basig madisgrasya kuno ko.”
Da, gibakwi ra lagi niya ang iyang gipanghambog! Hilom kong nakaingon. Unya wa ko makapugong sa akong kaugalingon, nakatukiki kog katawa.
“Gibugal-bugalan ko nimo, no? Abi di man madayon ang giingon ko nimong sports car, gikataw-an ko nimo? Pero okey lang, basig madisgrasya tuod ko.”
Mipakibo na lang ko sa akong mga abaga. Nagtuo ko nga mahunong na ang kahambgero ni Jake.
Usa ra ka dyip depasaheroan ang among gisakyan ni Jake. Nagtupad mig lingkod. Mikalit lang siya pagseryuso. “May uyab ka na?”
Sus, kuganga nako sa pangutana ni Jake. Wa gyud ko magdahom nga iya ning ipangutana nako.
Gingisloan ko siya. Unya nakahunahuna ko sa pagkumedya niya. Gusto kong makita ang iyang reaksiyon.
“Duna na, uy, Jake. He’s tall, dark and handsome.”
Nahilom si Jake. Hapit ko mahikatawa kay puwerteng guola sa iyang nawong. Karon, naklaro na gyud nako nga nakagusto siya nako apan di lang gyud kapadayag sa iyang feeling nako. Hadlokan og babaye si Jake. Mao ni ang akong pagtuo.
“Ikaw, Jake, may uyab na ba sab?”
Gitan-aw kog dugay si Jake. Nanghupaw siya.
“Wa pa. Duna unta koy naibgan. Aw, di kay ibog lang. Love gyud nako siya. Pero morag wa man koy chance nga iyang sugton.”
Hilom kong nakapahiyom. Dako ang akong pagtuo nga ako ang babaye nga iyang gipasabot. Gipahunong ni Jake ang gisakyan namong dyip paghitungod sa university nga iyang gitunghaan. Mikanaog na lang sab ko ug naglakaw ko paingon sa university nga ako sang gieskuwelahan. (SUMPAYAN)