Ang tiaw ni Jumar
Mitungas si Anne Curtas sa bukid. Ang maanyag nga reporter ug talent scout mosusi kon tinuod ba gyud ang estorya sa usa ka bata nga higante. Gitagoan kuno ang bata sa iyang ginikanan sa usa ka langob sa bukid sa Minglanilla.
Nganong gitagoan man? Naintriga si Anne. Kini maoy nag-aghat kaniya pagtungas sa bukirang bahin sa lungsod sa Minglanilla. Nahimamat niya ang magtiayong Alice ug Yoyon nga maoy ginikanan sa giingong bata nga higante. Iyang nasayran nga kasarangan lang ang bata si Jumar, apan dihang nag-edad na kini og nuybe anyos mikalit lang kinig tubo subra sa unom ka tiil ang gitas-on. Siya maoy kinatas-an nga binuhat sa ilang barangay ug mao kini ang hinungdan ngano nga miundang siya sa pag-eskuyla. Maulaw siya sa iyang mga klasmet ug dili na siya makig-atubang bisan kinsa gawas lamang sa iyang ginikanan. Nagtago-tago siya.
Nasabtan ni Anne nga may lain pang hinungdan nganong gitago si Jumar sa hinimong langob. Gusto siyang masayod. Gusto siyang masayod ug buot sab siyang makakita sa higante. Tungod niini giabangan ni Anne ang bakanteng balay duol sa balay sa ginikanan ni Jumar. Buot siyang makigsandurot sa magtiayon nga maoy nagkupot sa yawe paingon sa bulawan nga nagtago sa langob. Diha sa hunahuna ni Anne isip talent scout sa basketbol, ang kinidlap sa bulawan nga maangkon unya ni Jumar sa higayon nga mahimo kining Superstar sama nilang Lebron James ug Stephen Curry. Wala niya tuyoa nga nga nagtabisay sa iyang pulang ngabil ang iyang laway.
Sa unang adlaw sa iyang pagpuyo sa bukid mao ray nakita ni Anne ang anino ni Jumar ibabaw sa kangiob sa langob. Sa iyang kalkulo molabaw na sa pito ka tiil ang gitas-on ni Jumar nga karon nag-desi-sayis anyos na. Hinog na kini aron magbansay-bansay sa mga dula nga paugatay ug paugnat sa kusog. Malaumon siya nga iyang mahaw-as gikan sa langob si Jumar.
Pagka sunod adlaw mikalit lang pagsaka sa utok ni Anne ang kagaw sa naglatagaw niyang pangisip. Iyang lukmayon si Jumar. ‘Nganong dili? Gwapa ko. Seksi ko,’ nagyawyaw samtang nanghaplas og pahumot sa iyang lawas. Gisul-ob niya ang iyang pakigol nga denim shorts nga nakapasamot sa kaputi sa lingin ug lison niyang mga paa. Mikuyog siya sa ginikanan ni Jumar nga naghatod og rasyon sa batang higante. Nahimatikdan ni Anne nga daw nagpangusmo ug wala mahimutang si Jumar nga nakasingo sa pahumot nga nanuhotsuhot lagbas sa mga lungag ug yungib. Mitubay na si Jumar pagtubag sa mga pangutana ni Anne nga giwitik ug mibitik sa wala magkadimaong tubag gikan sa batang higante.
Sa mingsunod nga mga adlaw wala moadto si Anne sa langob kay milugsong siya sa lungsod sa Minglanilla aron mangumprag mga kinahanglanon sa balay. Gabii na siyang nahibalik sa bukid nga gibati ang tumang kalapoy sa lawas. Mihigda siya sa katre ug nahikatulog dayon. Wala siya makamatngon nga dihay tawo nga misulod sa iyang lawak nga hubo ang lawas. Ang tawo nagpakita og ‘batuta’ nga morag bukton ug kinumo sa usa ka dos anyos nga bata nga gipunting sa ‘langit.’ Nahigmata si Anne, apan kalit siyang nakuyapan sa kadako sa butang nga iyang nakita.
Gidali siya pagsapupo ni Jumar nga way laing tuyo gawas sa pagtiaw lang kaniya. (KATAPUSAN)