ABUEVA MIHILAK
Gipasabot ni national coach Chot Reyes kon nganong gikuha niya pagbalik si Calvin Abueva ug nagporma og gamay nga lineup sa Gilas Pilipinas alang sa pagpakigbatok niini sa higanteng puwersa sa Australia sa Window 2 sa 2019 Fiba World Cup qualifiers nga ipahigayon ugma.
Sa interbyu sa ESPN5, nagkanayon si Reyes nga naahat siya pagpili og gagmay nga mga magduduwa alang sa 14man lineup gumikan sa pagkaangol nila ni Troy Rosario ug Mac Belo unya wala sab motunga ang laing bigman nga si Raymond Almazan.
“Some of the original guys that we had in mind got injured like Mac Belo, Troy Rosario, then you all know that Raymond Almazan stopped coming to practices so we had to drop him as well,” pasabot ni Reyes.
Si Abueva gitangtang sab unta ni Reyes sa lineup gumikan kay sama ni Almazan, wala kini mitunga sa nagunang tulo ka mga praktis sa national pool sa tuig 2018.
Apan gumikan kay naahat si Reyes sa pagporma og gamay nga lineup, hayan naahat sab siya pagkuha og balik kang Abueva.
Nakadayeg sab si Reyes sa pagpangayo og pasaylo ni Abueva, kinsa mirason nga personal nga problema maoy hinungdan nga wala kini nakatunga sa ensayo sa team.
Unya nagsige na sab kini’g apil sa nagsunod nga mga praktis sa Gilas bisan gitangtang na kini sa lineup.
“Inspite of the fact that alam ni Calvin na hindi siya makakasama sa second window, panay pa rin ang punta niya sa practice. Wala kang maririnig sa kanya. He came and he was very committed,” dugang ni Reyes.
“Napaiyak talaga si Calvin sa tuwa nung malaman niya ‘yun at gustong gusto niyang makasama.”
Gipasabot sab ni Reyes kon nganong gihimo niyang closed-door ang ilang matag adlaw nga ensayo, usa ka semana sa wala pa sila molarga paingon sa Australia.
Matod ni Reyes nga kinahanglan nilang makatutok og maayo gumikan kay kuwang sila sa praktis.