POC reelection mani-obrahon?

So nahukman sa Philippine Olympic Committee (POC) nga mopahigayon sila og laing eleksiyon karong Biyernes. Kini maoy ilang nakab-ot nga kasabutan atol sa General Assembly nga gipahigayon niadtong Lunes didto sa Wack Wack Golf and Country Club sa Kaulohan.

Pero, matod pa ni Rep. Prospero Pichay, ang spokesman sa grupo ni Cojuangco, nga ang election committee nga gipangulohan ni Frank Elizalde, uban nila ni Bro. Bernie Oca sa La Salle ug election lawyer Alberto Agra maoy magbuot sa pagpahigayon niini.

Kining grupoha mao ni midesider sa pag-disqualify nila ni Ricky Vargas ug Bambol Tolento nga mao unta ang mokontra sa grupo ni Cojuangco niadtong 2016 POC Election tungod kay dili kuno kini aktibo sa pagtambong sa ilang general assembly.

So kon sila gihapon ang magbuot, di kaha i-disqualify na pud nila sila si Ricky Vargas ug Bambol Tolentino nga modagan pagka-presidente ug vice president tungod sa susamang rason?

Hinaot nga dili lang unta, kay nipasidaan na ra bang daan si Pichay nga ang pagpahigayon nilag balik sa election dili tungod sa kamandoan sa Regional Trial Court (RTC) sa Pasig City kon dili tungod sa rekomendasyon sa International Olympic Committee (IOC).

Sa ato pa, ilang ibasura ug ibaliwala ang hukom sa korte nga nag-ingon nga qualified sila si Vargas ug Tolentino ug adto sila motuman kon unsay desisyon sa ilang election committee kalabot niini kay ila mang gitu yanan nga maoy magbuot.

Wa ra ba diay pasudla si Ramon Fernandez sa Philippine Sports Commission (PSC), isip observer, sa maong general assembly.

Pero nakatimaho man tuod nga morag dunay maniobra, pero sa gihapon, mopadayon

yud si Vargas sa iyang pagpapili. Motambong siya ug ang iyang grupo ug andam sila bisan unsa pay mahitabo.

Nisamot og ka kulbahinam ning sitwasyona da. Kon simbako modaog gihapon ang grupo ni Cojuangco, mosamot og kayabag ang atong Philippine Sports kay dako ang posibilidad nga dili ni siyento-por-siyento nga suportahan sa PSC.

For sure, ma-revive pa ani ang isyu kalabot sa liquidation sa ilang nagasto sa niaging mga international competitions nga hangtod karon wa pa yud nila mahimo.

Unya og way budget gikan sa PSC unsa na man lang unya ang mahimo sa mga NSA? Kinsa mang mga atletaha ang maikag o ma-engganyo pa sa pag-ensayo kon way financial support gikan sa gobiyerno.

Kini gung POC kusog moingon nga di makapanghilabot sa ilang kalihukan ang gobiyerno kay kini usa ka independent ug private organization unya kusog mangayo og kuwarta sa PSC. Pastilan.