TINAGAKAY!
Pulos kulbahinam ang mga kombati karong adlawa sa Philippine Basketball Association (PBA) Philippine Cup sa Araneta Coliseum diin posibleng duha ka teams ang mawagtangan og paglaom nga makaabante sa nagkaduol nga quarterfinals.
Sa premirong duwa, ang GlobalPort Batang Pier makigbatok sa Kia Picanto samtang mag-abot sa main game ang Blackwater Elite ug Phoenix Fuel Masters.
Ang Batang Pier ug Fuel Masters parehong adunay 4-5 nga rekord, naghupot og 4-6 nga baraha ang Elite samtang ang Picanto adunay 1-8 nga rekord.
Sa nangalambigit nga teams, ang Picanto ang wala na’y poruhan nga makaabante samtang ang laing tulo mosagubang sa kombati sa pagpakabuhi. Aron makaseguro og luna sa quarter-finals, ang Batang Pier kinahanglang modaog batok sa Picanto ug hasta sa katapusang tahas niini batok sa Fuel Masters.
Kon mapilde ang Batang Pier batok sa Picanto, hayan delikado silang manamilit kon modaog ang Fuel Masters batok sa Elite.
Ang Fuel Masters mokombati nga wala ang usa sa ilang mga sinaligan nga si Matthew Wright samtang wala sab si Allein Maliksi sa habig sa Elite.
Kon buot hunahunaon, balanse ra ang kompetisyon sa duha ka mga kampo.
Si Phoenix coach Louie Alas malaumon kabahin sa ilang poruhan hilabi na kay sila maoy nagkonrtolar sa ilang denastiya. “At least nasa kamay pa namin ang fate namin. Nasasa-amin
na ‘yon to make things
happen,” matod ni Alas sa interbyu sa PBA.ph.
Ang Batang Pier, sama sa Fuel Masters, dakodako sab og poruhan nga makaabante.
Apan matod ni Batang Pier coach Pido Jarencio nga dili sila angayang molugak bisan gamay batok sa nagkasalimoang nga Picanto.
“We need to play hard. No room to relax,” batbat ni Jarencio. “Kia is a dangerous and unpredictable team.”
Bisan wala na sila’y paglaom nga makasulod sa quarterfinals, ang Picanto misaad nga ipagawas gihapon nila ang tanan nilang makaya aron makabitbit og gamayng garbo sa ilaha unyang pagpanamilit.
“Despite our situation we remain unperturbed and defiant as we go all out to get a win,” asoy ni Kia coach Ricky Dandan.