Ang fake news ni Go

Miulbo ang kaspa ug giakusahan ni Special Assistant to the President Christopher “Bong” Go ang Rappler, usa ka digital news organization, nga nagpataka na lang kuno og suwat og balita nga nakadaot sa iyang pagkatawo. Enero 16, 2018, gikataho nga siya nag-apil-apil sa P15.5 billion Frigates Acquisation Project o kalabot sa pagpalit og barkong i-gugubat alang sa nasod.

Gawas nga iyang gihinganlan og iresponsabli ug malisyuso ang maong balita, iya kining gihulagway nga usa ka “fake news.”

Sa maong balita, si Go ug ang iyang opisina nahisgutan, matod pa, sa tulo ka dokumento nga nagtuki sa negusasyon tali sa Malacanang, sa Department of National Defense, ug sa Philippine Navy samtang gidebatihan pa ang pagpili sa Combat Management System nga maoy palitan.

Tungod ning balitaa, gidudahan nga kini maoy usa sa mga rason, kon nganong wa na pasudla sa niaging adlaw ang Malacanang reporter sa Rappler sa Palasyo.

Kon dili tinuod nga ni-interbener si Go kalabot sa nahisgutang deal nganong dili man niya pangayuon ang mga dokumento nga maoy gibasehan sa Rappler aron mohimo siya og imbestigasyon sa paglimpyo sa iyang pangalan?

Sa tulo ka dokumento sila mismo si Defense Secretary Delfin Lorenzana ug usa ka Lloyd Christopher Lao nga anaa ra usab sa opisina ni Go ang mipamatuod, sigon sa taho sa Rappler. So dali ra alang kaniya ang pagsusi kalabot niini.

Unfair man tuod ang balita kon wa kini igong basehan apan mas unfair pa kon ang balita nga adunay mga dokumento nga igong makasuporta niini, apan sa gihapon tawgon nga fake news.

Mas kuyaw kon ang tanang tinuod nga mga balita nga nagyagyag ug nagbulgar sa katinuoran ilabi na sa hiwing binuhatan dili na hinuon tuohan kay kini giingon nilang fake news.