10-year validity nga driver's license

Gikan sa lima ka tuig, moabot na og 10 ka tuig ang gidugayon sa paghupas sa lisensiya sa mga drayber nga iisyu sa Land Transportation Office (L|TO).

Kini, kon wa kay mahimo nga kalapasan sa balaod sa trapiko sa paggamit sa imong lisensiya sud sa lima ka tuig nga validity niini diin sa imong pag-renew lugwayan kini og lima ka tuig.

Si Alita Pulga, assistant regional director sa LTO 7, niingon nga mao kini ang kondisyon sa Republic Act 10930 diin nagpaabot na lang sila sa implementing rules and regulations sa dili pa kini masugdan pagpatuman. Ang balaod gipirmahan ni Presidente Rodrigo Duterte niadtong Agusto 2017.

“Maninguha gyud mo nga dili mo madakpan even sa local government unit by citation o TOP (temporary operator’s permit) kay madakpan gani mo bisan usa lang ka violation, mahimo ni siya nga record sa inyong license diri sa LTO,” pamulong ni Pulga atubangan sa mga aplikante atol sa ceremonial printing ug roll-out sa license cards nga balido og lima ka tuig sa Driver’s License Renewal Center (DLRC) sa LTO 7 sa SM City Cebu kagahapon sa buntag.

Sa ceremonial printing, si Cebu City acting Mayor Edgardo Labella ang giimprintahan sa lisensiya nga may lima ka tuig nga validity, nilungtad lang og 5 minutos ug 56 segundos gikan sa fill up sa iyang aplikasyon form hangtod sa pag-imprinta sa iyang plastic nga license card.

“This is a much, much improved system of processing our driver’s license, 5 minutes and 56 seconds less than 6 minutes,” pahayag sa bise mayor nga nipaambit nga kaniadto maabtan og pipila ka semana ang pag-imprinta sa bag-ong mga lisensiya.

Matod niya, ang makalangay sa proseso mao ang paglinya sa paghimo sa transaksyon.

Apan ang mga netizen dili motuo nga paspas na ang transaksyon sa paglukat og driver’s license ug nagbagulbol sa Facebook page sa Superbalita Cebu kay hangtod karon wala pa nila makuha ang ilang plastic license cards nga pila na sila ka tuig nagbalikbalik sa LTO 7.

“Mao gyud basta dagko og ranggo ug pulitiko unahon gyud nila. Ang luoy ang ultimo mangadlawon intawon para madali og human, unsaon naa may slot 30 ka buok sa internetan hay kapait,” paambit sa usa ka netizen.

“Ahh, kami gani huwat pag pila ka buwan, mag pa schedule pa una mi ma-entertain. Lahi rajud naay Position,” pahayag sa laing netizen.

Si Pulga nangayo og pasaylo ug pagsabot sa ilang mga kliyente nga nadugay ang pag-imprinta sa driver’s cards, apan nipasalig nga mopaspas na kini sa higayon nga maabot na ang mga ekipo gikan sa ilang central office.

Siya nipasabot nga giuna nila ang pag-atiman sa walkin nga mga aplikante nga limitado lang sa 50 ka booking matag adlaw aron dili madungagan ang backlog sa imprintahunon nga mga lisensiya.

Abli na usab ang ilang buhatan sa matag Sabado gikan sa alas 8 sa buntag hangtod sa alas 5 sa hapon, aron moatiman sa mga backlog diin dili sila modawat og mga transaksyon.

Sa pagkakaron, sa 23 ka mga buhatan sa LTO 7 sa Central Visayas, sa extension office sa lungsod sa Medellin ug Driver’s License Renewal Office sa Fuente Osmeña na lang.