TRAK GALUMBA, NATUMBA, NAKATRAPIK
MGA SAKYANAN SA SRP WA KAIROG OG 8 KA ORAS
Dili tiaw ang kahuot sa dagan sa mga sakyanan nga resulta sa pagkalimbuwad sa usa sa duha ka mga trailer truck alas 12 kagahapon sa kaadlawon.
Ang trak nagkarga og toneladang semento dihang natumba ug nagkatag ang mga karga sa South Coastal Road sa South Road Propertties (SRP).
Base sa imbistigasyon sa Cebu City Transportation Office, ang prime mover (GUK) nga gimaneho ni Raymond Etang Sobremisana, nakiglumba sa laing trailer van.
“Naglumbaanay na silang duha unya padong saka na sa bridge. Hunat gyud sila unya fully loaded, mao naglisod na og bawi kay naigo ug nikatkat sa
center island and unya nibuto ang duha ka ligid, wala na mabawi mao tong nabalitok,”paghulagway ni Francisco Ouano, operations head sa CCTO.
Matod ni Ouano, nga human sa disgrasya, ang mga sakyanan nga mopaingon sa SM Seaside City ug dakbayan sa Talisay di na makaagi sanglit naokupar sa trailer ug prime mover ang masig ka pikas karsada, wa pay labot sa dagkong sako sa semento nga nakatag sa dan.
Samtang usa na lang ka lane ang nagamit sa mga motorista paingon sa Plaza Independencia ug North Reclamation Area sanglit ang gikalumba naali usab sa usa ka lane.
Alas 8 na sa buntag kagahapon kun walo ka oras una nakaagi og sugod ang mga sakyanan paingon sa south samtang alas 3:45 na sa hapon hingpit nga na-pullout ang trailer ug prime mover.
Niabot og 15 ka oras ug 45 minutos ang sakripisyo sa mga motorista gumikan sa maong disgrasya nga way naangol gawas lang sa pahinante nga nagadlasan.
Si Ouano nagkanayon nga niabot og 40 metros ang skid mark sa nalimbuwad nga trailer timaan sa kusog nga dagan. Ang kahuot sa trapiko naabot sa NRA gikan sa Cebu City ug dakbayan sa Talisay.
Ang operations chief sa CCTO, kinsa niresponde pasado alas 5 na sa buntag, nibutyag nga ilang gitabangan og bira ang
trailer ug prime mover gamit ang ilang towing truck.
Gipatangtang ni Ouano ang railings nga ilang giali dapit sa SM Seaside City aron maka-left
turn ang mga sakyanan gikan sa Talisay para makalikay sila sa grabeng trapik.
Ang lisensiya sa duha ka driver anaa na sa CCTO samtang ang ilang gimaneho nga mga sakyanan tua sa impounding area sa South Road Properties nga posibleng magpabilin og usa ka buwan.
SILOTAN?
Si Mayor Tomas Osmeña nagplano nga pahamtangan og silot o multa ang operator sa maong sakyanan.
“I am considering penalizing a truck owner with fines and / or impounding based on every hour of traffic delay an accident of their causing makes,” ang post sa mayor. /