P4.7M NGA SHABU NASAKMIT
Nasikop sa mga sakop sa Drug Enforcement Group 7, inabagan sa Regional Special Operations Group, ang usa ka 23 anyos nga lalake nga nakuhaan og upat ka mga bulto sa gituohang shabu atol sa buy bust operation sud sa usa ka motel sa V. Rama Avenue, Barangay Calamba, siyudad sa Sugbo kagahapon sa kaadlawon.
Nasikop si Walter Oliamot, taga sitio Gatepass, Barangay Guadalupe, siyudad sa Sugbo.
Ang gituohang shabu gibana-banang mobalor og P4.7 million.
Giangkon ni Oliamot nga makatulo na siya ka mga higayon nga namaligya sa binulto nga drugas bugti sa suhol nga P30,000.
Matod ni Police Supt. Glenn Mayam, hepe sa DEG 7, nga tulo ka mga buwan nilang gi-monitor ang illegal nga kalihukan ni Oliamot pinaagi sa paggamit sa police asset.
Niabot ang stocks sa suspek ug nakigsabot dayon sila nga mopalit og binulto sa illegal nga drugas.
Giila si Oliamot nga usa ka dakong drug player sa Central Visayas human masuta nga di mobaligya og ginagmay.
“Dugay na namo siya nga gina monitor hangtod nga naabot iyang stocks kagahapon mao to among gi buy bust. Ang iyang mga customer gikan sa mga layo nga lugar mag order lang, tapos dal-on nila kay by bulk siya,” matod ni Mayam.
Matod ni Oliamot nga gi-recruit siya usa ka Juan Daclan nga iya ra usab nga silingan nga iyang naestorya panahon nga mag duwa silag basketball sa Barangay Guadalupe.
Siya gisaaran nga hatagan siya og porsiento kon mahatag nya ang mga binulto sa illegal nga drugas nga moabot og P30,000.
Dugang pa niya nga si Daclan ang motawag sa usa ka alyas Siao nga naa sa sulod sa Cebu City Jail kong dunay mopalit sa dinagko nga supply ug siya na usab ang mo deliver niini sa kustomer.
“Aron maka kwarta sad ko kay mopatong man sad ko. Si Juan ang mo contact anang Siao nga naa daw sa Kalunasan kon naay mopalit,” tug-an ni Oliamot.
Nakahuna-huna na unta siya nga moundang apan nahadlok siya sa iyang kinabuhi tungod kay naapil na ang iyang ngalan sa listahan sa drug player sa pagtuo nga patyon ra usab siya sa ilang grupo.
Ang kapulisan mosubay sa pamahayag ni Oliamot kon unsa ka tinuod ang mga gipangangkon niini.
Matod ni Mayam nga wa maggikan sa sulod sa bilangoan ang supply sa drugas kon di ang transaction himuon sa sulod pinaagi sa telepono ug ang drug personality nga naa sa City Jail mao na ang motawag sa iyang tawo sa gawas aron mo deliver sa drugs.
Ang Police Regional Office 7 mopataas pa sa ilang monitoring sa mosulod nga illegal nga drugas sa Central Visayas dungan sa pag- angkon nga padayon ang problema sa drugas sa rehiyon.
Lakip sa ilang gi awhag ang management sa mga motel nga sila mismo ang mobantay kung duna bay mga iligalista nga nakasulod sa ilang establisamento aron dali nalang unya ang pagsikop kanila. /