Petisyon batok Escario gibasura sa korte
Gibasura sa korte ang gisang-at nga petition for quo warranto ni Bantayan Vice Mayor Antonio Montemar batok ni Mayor Ian Christopher Escario, mga tinugyanan sa Commission on Elections ug sa Department of Interior and Local Government (DILG).
Si Montemar niduso sa petisyon sa korte niadtong Mayo sa miaging tuig aron pagkwestiyon sa paglingkod ni Escario isip mayor, hulip sa gi-disqualify nga si Arthur Despi.
Una nang gipadayag sa kampo ni Despi nga kon duna man gani mohulip sa iyang posisyon pagka-mayor, di kini mao si Escario kay napildi man siya sa eleksiyon ug nga si Montemar ang kinahanglang mo-asumir sa katungdanan.
Bisan og nidaog si Despi sa 2016 elections, napakanaog kini sa iyang pwesto human masuta sa Comelec nga depektuso ang gisumitir niya nga Certificate of Nomination and Acceptance (Cona) atol sa filing sa certificate of candidacy.
Gipaburan sa Bogo City RTC Branch 61 ang mosyon ni Escario pagpa-dismiss sa petisyon ni Montemar, lakip na sa hangyo niini nga moluwat ang korte ug temporary restraining order o kaha writ of preliminary injunction.
Sa kamanduan ni Judge Antonio Marigomen nga pinetsahan og Enero 22, 2018, gipadayag niini nga way legal nga basehanan si Montemar pag-file sa Petition for Quo Warranto ug nga wa sab siyay katungod nga mo-asumir isip mayor sa lungsod sa Bantayan.
Kini tungod kay si Escario maoy gideklarar nga mananaog pagka-mayor sa niaging eleksiyon ug gani ang desisyon sa Korte Suprema ug Comelec labot niini, nahimo na man nga final and executor.
Dugang ni Marigomen, di usab mahimong i-subject si Escario sa quo warranto proceedings ilabi na kay wa man nabakante ang posisyon sa mayor sa lungsod.
Gihimug-atan usab sa korte nga ang diskwalipikasyon ni Despi tungod sa depektuso niya nga Cona, nagpasabot nga void o way bili ang iyang kandidatura sukad pa sa pagsugod.
Nunot niini, gitumbok sa korte nga way legal capacity ang petitioner nga si Montemar pagkiha ug nga ang iyang petisyon way cause of action.
Gawas kang Escario, lakip sa mga respondent sa petisyon ang Comelec Regional, Provincial ug Municipal Officer, ang mga sakop sa Special Board of Canvassers, ang director sa DILG Regional ug Provincial Office ug pipila ka John Doe.