Masuso nga gilabay i-release na sa ospital
Di pa mabalik sa poder niadtong 17 anyos nga inahan ang iyang masuso nga gi-release sa tambalanan kagahapon.
Sud sa usa ka semana nga gipaubos sa medical observation ang bag-ong gipakatawo nga batang babaye human kini gilabay sa baybayon sa Sityo Camansi, Barangay Pajo, Lapu-Lapu City niadtong Pebrero 22.
Si Pajo Barangay Kapitan Junard Chan nibutyag nga ipaubos sa kustodiya sa City Social Welfare and Services sa Lapu-Lapu ang masuso nga temporaryong ipahiluna sa barangay health center birthing home.
Ilabi nga nagpadayon sa counselling ang 17 anyos nga inahan gumikan sa gibati nga depression.
Tug-an ni Chan nga kapin sa 10 ka magtiayon ang miduaw sa iyang buhatan nga nipadayag og interest nga mosagop sa bata lakip na ang pagpakisayod sa proseso sa adoption.
“Pagasabutan pa gyud na (kon ipasagop) og klaro sa inahan ug DSWD,” asoy sa opisyal.
Sa buhatan sa DSWD Regional Office ang moatiman niadtong gustong mo-adopt sa bata.
Giuwan sa mga donasyon ang bata sama sa mga gamit alang sa bag-ong natawo lakip na sa diapers ug gatas.
Giklaro sa inahan nga maglisod siya sa pagbuhi sa iyang anak gumikan sa kawad-on.
Dugang pa ni Chan nga nipadayag og interest ang teenager nga inahan nga mopadayon og tungha sanglit nangandoy siya nga mamahimong magtutudlo.
Sa sayo pa, na-ukay ang mga lumolopyo sa Sityo Camansi sa dihang napalgan ang batang babaye nga nagpa utaw-utaw sa baybayon nga nagpatong sa mga basura.