Haay, ang CPDRC

Sa makausa pa, sabit na sab ang Cebu Provincial Detention and Rehabilitation Center (CPDRC) ning pagkasikop sa usa ka Willard Capacio atol sa buy-bust operation nga gipahigayon sa Drug Enforcement Unit (DEU) niadtong Lunes didto sa lungsod sa Badian. Sa gihimong pagsukit-sukit sa mga tinugyanan sa balaod, ang 36-anyos nga Capacio, mibutyag nga pipila sa mga tigpayuhot sa gidiling drugas adto magkuhaan og supply sa CPDRC.

Nakuha gikan ni Capacio, nga nagpailang tour guide sa Barangay Matutinaw sa nahisgutang lungsod, ang upat ka gagmayng pakite sa shabu nga mokantidad og P2,000 ug P500 nga marked money.

Dili ni maoy unang higayon nga ang CPDRC, nga kaniadto naila ug nasikat sa tibuok kalibutan tungod sa dancing inmates, nakontrobersiya sa pagkalambigit sa gidiling drugas apan ambot og nganong hangtod karon wa pa gihapon kini mahatagi og kasulbaran ni Governor Hilario Davide III nga gamay ra man unta ning maong bilanggoan.

Duna man tuoy imbestigasyon nga gihimo ang gobernador nga miresulta sa paglahugay sa mga CPDRC personnel sama na lang sa pagpalagpot sa pipila ka mga jail warden ug ubang mga jail guards, pero sama sa gihapon nagpadayon ang problema.

Kini maoy nakapaduda nga hayag ang posibilidad nga adunay mga piniriso nga nakasandig og mga dagkong opisyal diha sa Kapitolyo nga dili matarog sa gobernador nga mao ra usab ang nagpadagan sa pagpayuhot og drugas sa CPDRC.

Mga inilang drug personalities sa Sugbo nga nabilanggo na karon sa CPDRC ang padayong nagpadagan sa pagpayuhot sa gidiling drugas diha sa maong prisohan.

Kon wa gyuy mahimo si Davide niining problemaha, mas maayo pa siguro og iya na lang ning i-turn over ngadto sa Bureau of Jail Management and Penology (BJMP) kay inutil man ang iyang administrasyon kabahin niini.