Way ‘quickie’ sa divorce bill

Alang niadtong nanghingap-hingap na sa mas sayon nga pagputol sa talikala sa kaminyuon, gipasar niadtong Pebrero 21 sa House committee on population and family relations ang balaudnon nga magtugot sa absolute divorce dinhi sa Pilipinas. Unanimous ang boto sa maong komitiba.

Si Speaker Pantaleon Alvarez, nga nangusog sa pagpasar sa maong balaudnon, niingon nga ilakip kini sa plenary debate sa sunod semana ug hayan nga mapasar kini sa ikatulo ug katapusang pagbasa sa di pa ang congressional break karong buwana.

Pero yuna pa, tinuod bang mahimong sayon na lang ang pag-anular sa kaminyuon ubos ning maong balaudnon? Si Kongresista Edcel Lagman sa Albay niingon nga ang absolute divorce bill di magtugot sa “quickie” o “express” divorce.

“The absolute divorce bill does not allow ‘drive through,’ ‘no-contest’ or ‘quickie’ divorces,” matod pa ni Lagman. Gani, dunay probisyon nga nagdili sa panagkonsabo sa magtiayon o kaha pugson ang usa sa magtiayon sa pakigdiborsiyo.

Si Lagman niingon nga ang maong balaudnon di sama sa paagi sa diborsiyo nga gisagop sa Estados Unidos nga maoy gikabalak-an sa mga kaparian. Ang Las Vegas nadungog nga dunay mangahubog ug magpakasal inig kagabii, apan magdibosiyo inig mata sa buntag kay nahuwasan na.

Sa absolute divorce bill, way decree of absolute divorce nga luwatan subay lang sa panagsabot-sabot o “stipulation of facts” o kaha “confession of judgment.’ Matod pa ni Lagman gimandoan ang piskaliya sa pag-imbestigar kon wa bay collusion o panagkonsabo sa magtiayon.

Kadtong kapikas nga mopugos sa laing kapikas o kadtong magtiayon nga managkonsabo mag-atubang sa lima ka tuig nga pagkabilanggo ug multa nga P200,000. Pero kinsa may motug-an nga nagsabot-sabot lang sila?

Ang basihanan sa diborsiyo mao kadtong mga magtiayon nga nagbuwag na sud sa labing menos lima ka tuig, gawas lang kon ang usa kanila nagtrabaho sa gawas sa nasud o sa lain nga rehiyon, psychological incapacity, gender reassignment surgery ug irreconcilable marital conflicts nga di na mauli pa.

Ang Pilipinas ug ang Vatican mao na lang ang mga lugar sa kalibotan nga way diborsiyo. Masabot nato nga di kinahanglan ang diborsiyo sa Vatican kay ang nanagpuyo didto mga pari ug mga madre, pulos ulitawo ug dalaga, labi pa gyud ang Santo Papa.

The absolute divorce bill does not allow ‘drive through,’ ‘no-contest’ or ‘quickie’ divorces.”