Nag-yellow na nga hulagway
Dili ko sharp og memory. Dali ko’ng malimot. Di na gani ko kahinumdom unsa to akong pamahaw ganina. Pila na gani akong edad? Ambot. Ning-undang na kog ihap paglapas sa kalendaryo. Karong buwana man tingali to akong birthday. Di na ko sure.
Mao nga nakuratan ko dihang adunay mi-tag nako sa Facebook sa miaging semana. Gi-tag ko sa piktyur nga labihang karaana na, nag-yellow na ug hanap na ang mga dagway sa mga naa sa hulagway.
Pero pamilyar ang mga nawong, labi na ning naa sa atubangan. Ang buhok pinatunga, ang smile nga hilaw kay nauwaw sa camera, ang mga mata nga morag mihiyong sa kainit sa adlaw. Kaila ko aning bataa? Kinsa gani ni siya ha?
Piskot ako man ni! Ako ni sa nag-edad pa kog 12. Kining linukot nga papel nga akong gidala morag diploma ni. Diploma pud ning gidala sa akong mga kauban. Graduation ni namo sa elementary. Sakto. Buanga.
Ang nag-post sa piktyur ang balediktoryan namo sa klase nga tua na nagpuyo sa gawas sa nasod uban iyang pamilya. Ambot unsay nasud sa iyang ulo nga iya man ning gi-post og kalit. Gimingaw tingalig inun-onan.
“Gimingaw na ko ninyong tanan!” matod niya sa iyang post.
Gitagsa-tagsa nakog tutok ang mga nawong, ug diha sa akong pagkamalimtanon hinay-hinay nga naporma ang mga pangalan. Si Delilah, si Abigail, si Sheila, si Eugena?
Ngano man ning mga babaye nga kon sa elementary pa mas tag-as man kaysa mga lalaki? Basin putot lang gyod ko? Kumusta na si Eldrid, katong mas putot pa nako apan labihan ka maayo sa math?
Pila na ka tuig ang milabay? Kapila na kaha namunga ang mga punoan sa mangga nga among gipangtanom panahon sa tree planting? Pila na kaha ka baktin sa among silingan ang nahimong anay? Pila na ka bagyo ang milabay?
Kumusta na si Jennifer, katong gipadad-an nakog love letter apan gisumbong na hinuon ko’s iyang mama, nga misumbong sab sa akong mama, nga mikasaba nakog maayo kay unsa kunoy nahibaw-an nako sa gugma nga may gatas pa akong baba?
Asa na akong best friend nga si Padrick? Kumusta na si Jerry, si Franklin, si Carlo, si Jojo, sila nga mga gwapo ug crush sa tanang babaye, samtang ako bisan ang tinderag sulot gawas sa gate di gani maibog?
Naa pa bay sulot? Unsa ganiy porma atong pagkaona nga paborito namo sa recess paresag ice candy?
Nagbaha sa akong panumdoman ang nangagi. Naglumba, nag-ilog kinsay unang atimanon sa akong hunahuna. Abi ko ba og limtanon ko.
Hahay, makamingaw, sa kasingkasing makalipay apan hapdos gamay. Makagutom? Bitaw, gutom ra tingali ni. Taym pa, naniudto na ba ko? Nalimot na ko.