Since I found you
Bisag sa paghunahuna lang gani, namatikdan ko sa akong kaugalingon nga dunay nakakuwang sa gibati kong kalipay sa tanan nga nahitabo sa akong kinabuhi. Si Padre Homer gituhoan nako nga akong makalimtan sa higayon nga sugton ko na si Rald, nga sa among relasyon ni Rald wa na koy laing hunahunaon kondi siya na lang. Apan dakong sayop ang nahitabo.
Wa makatabang ang among relationship ni Rald aron hingpit kong makalimtan si Padre Homer.
Unsa ba gyud kining gibati ko niya? Gugma ba nga tawhanon o unsa pa diha?
“Pag-move on, Kate. Ayaw na hunahunaa ang igsuon kong pari. Look, midaot ka. Namiyahok ang imong mga aping. Nagsugod na pagluspad ang imong nawong. Unsay mahitabo nimo kon magpabilin kang maghunahuna sa unsa man nga naa ron sa imong kasingkaing?”
Wa magkuwang sa pagtambag si Greta nako. Iyang gipabatyag nako nga concern siya sa akong kinabuhi, sa akong pagka babaye, ug sa akong future.
“Di ko lang gyud tuyuon, Grets, nga mahunahuna ko siya.” Ug sa atubangan ni Greta di na ko mauwaw nga mopatulo sa akong mga luha. Manghupaw si Greta ug unya mangagho. Mibati gyud siyag kaluoy nako. Apan husto man sab siya. Nia ra ako ang tanan. Apan ang pag-adjust sa akong gibati lisod nakong buhaton.
“Sori, Rald. The time is up. Enough is enough.”
Mitulo ang mga luha ni Rald dihang gitug-anan ko siya sa tanan. Naluoy ko niya apan lisod gyud higugmaon ang tawo nga wa ipitik sa kasingkasing. Namisita siya ako sa gipuy-an kong boarding house niadtong tungora. Angay na lang gyud siyang makahibawo sa tinuod. Labaw siyang makaluluoy kon ihilom ko niya ang tinuod kong gibati.
“Nganong naingon ka man ani, Kate? Gipalaom ko nimo pero pagkasakit aning imong gibuhat nako?”
Wa mauwaw si Rald nga mibakho sa akong atubangan. Pagkadako diay sa iyang gugma nako.
Apan unsay akong mahimo? Di ko mapugos ang akong kaugalingon nga higugmaon siya.
“Pero gipasidan-an na tika, Rald, sa akong pagsugot nimo nga wa koy love nimo?”
Nakakita kog rason aron makuha-kuhaan ang gibati kong guilt. Ug sa ngadto-ngadto misabot si Rald. Iyang gidawat sa kinasingkasing ang akong desisyon. Ug sukad niadto, wa na siya magsamok nako.
(SUMPAYAN)