Si Tisoy ug si Prinsipe Agukoy
Naglingkod si Tisoy sa nag-igdal nga gamot sa kahoyng akasya diha sa daplin sa baybayon. Nagpaabot siya sa iyang higala nga si Mariel, usa ka engkantada nga magdala og tubig nga kahibulongan nga maoy makabuntog kang Prinsipe Agukoy sa umaabot nilang sangka. Ang tubig mao ang iyang gilauman nga makatabang kaniya sa pakig-away batok kang Prinsipe Agukoy kinsa karibal niya sa gugma ni Prinsesa Elena, anak ni Hari Israel. Apan wala moabot si Mariel.
Nasabutan nilang Hari Israel ug Rayna Josefa nga si Prinsipe Agukoy maoy mahimong bana sa ilang anak, bisan og wala pa nila masayri ang tinuod nga pagka tawo niini. Nagkasabot sila nga ipakasal sa daling panahon ang prinsipe ug ang prinsesa, kay ilang nahibaw-an nga si Prinsesa Elena nahigugma kang Tisoy nga usa lang ka hardinero sa palasyo. Wa kini ikalipay ni Hari Israel ug nagpangagot ang iyang mga ngipon sa pagkasayod niini. Dili niya madawat si Tisoy kay bahandi lang ang giapas niini sa iyang anak nga prinsesa.
Si Prinsipe Agukoy maoy nagustoan sa hari nga mahimo niyang umagad kay prinsipe man kini sa laing gingharian, bisan wala pa siya masuhito sa pagka tawo niini, itandi kang Tisoy nga usa lang ka ulipon ug musimos.
May nakasulti kang Hari Israel bahin sa pagka tawo ni Prinsipe Agukoy. Nga si Prinsipe Agukoy kanunay magyampungad sa baybayon panahon sa kagab- hion. Ug matod sa nakakita kanunay kining moinom og tubig-dagat. Daw sa kanunay kining giuhaw. Labaw sa tanan, kanunay kining maligo sa dagat kon taob na, nga gikahibulong kaayo sa mga nakakita. Daghan usab ang natahap sa gipakitang lihok ni Prinsipe Agukoy, ilabi na gayud kay itom kaayo ang pamanit niini. Apan ang tanan wala tuohi sa hari, kay alang kaniya, mga pagdaot lamang kini sa prinsipe. Nagtuo ang hari nga nasina lang ang mga tawo kang Prinsipe Agukoy kay mao man kini ang pamanhunon ni Prinsesa Elena.
Gusto sa hari nga ipapatay si Tisoy aron wala nay magsamok pa kanila. Ug si Prinsipe Agukoy maoy gitahasan sa hari nga maoy mohimo niini. Gusto ni Hari Israel nga magsangka si Tisoy ug si Prinsipe Agukoy pinaagi sa espada. Gihatagan sa hari si Tisoy og espada nga habulan aron dili kini makalahutay batok kang Prinsipe Agukoy.
Miabot ang adlaw sa panagharong nilang Tisoy ug Prinsipe Agukoy, apan wala gayud moabot ang engkantadang si Mariel. Gikulbaan si Tisoy kay nasayod siyang wa siyay dag-anan sa prinsipe, nga matod pa ni Mariel, dili usa ka ordinaryong tawo si Prinsipe Agukoy.
“Karon, Tisoy, duslakon ko ang imong kasingkasing ning akong hait nga espada kay sugo man kini ni Hari Israel aron dili ka na makasamok pa kanila!” maisugong namulong si Prinsipe Agukoy. Gitigbas niya si Tisoy nga naigo sa abaga.
Miping-it si Tisoy sa kasakit. Unya kalit mitunga si Mariel nga nagdala og garapa nga gisudlan sa tubig nga kahibulongan. Iyang gihatag kang Tisoy nga daling misablig sa tubig sa nawong ni Prinsipe Agukoy. Kalit nahimong dakong Ukoy ang prinsipe. Misudlot ang mga mata ni Hari Israel sa iyang nakita. Nagbasol siya sa bati nga taras nga iyang gipakita kang Tisoy. Gidayeg kini niya karon. Nahinumdom sab siya sa sulti sa mga tawo nga kanunay ang prinsipe moinom og tubig-dagat ug maligo panahon sa gabii, kay ukoy man diay kini nga hilom nga nahigugma sa anak niyang prinsesa.
Gipasalamatan ni Hari Israel si Tisoy sa iyang pagpukan kang Prinsipe Agukoy nga mibalik na sa ilang gingharian ilawom sa dagat. Gihimo niya si Tisoy nga sakop sa hut-ong sa mga guwardiya nga nagbantay sa seguridad sa hari, rayna ug prinsesa sulod ug gawas sa palasyo.
(KATAPUSAN)