SMC-SAC Awards karong Marso 26
Ipahigayon karong Marso 26 ang Sportswriters Association of Cebu (SAC)-San Miguel Brewery Sports Awards sa Robinsons Galleria Cebu.
Ang kalihukan, nga nagpatong na sa ika-31 ka mga tuig, mohatag og pasidungog sa mga atleta nga nakahatag og dungog sa Sugbo sa miaging tuig.
Lakip sa mga pasidunggan mao sila si June Mar Fajardo sa basketball, marathon queen Mary Joy Tabal, longest-reigning Filipino world boxing champion Donnie Nietes ug women’s World 10ball champion Rubilen Amit.
Pasidunggan sab ang Sugbuanong mga atleta nga nakarepresentar sa Pilipinas sa Southeast Asian Games sa miaging tuig,
“The SAC-SMB Sports Awards is the chance for the Cebuano athletes and Cebu-based athletes to be recognized by the people who write about them,” matod ni outgoing SAC president Mike T. Limpag.
Si sports patron Jean Henri Lhuillier, kinsa dugay na nga nagsuporta sa tennis ug softball, maoy pahalipayan alang sa Sportsman of the Year award.
Ang ubang tunolan og major awards mao sila si McAvyngr Alob, gold medalsit sa 2017 World Taekwondo Hanmadang Championship, Lloyd Jefferson Go, NCAA Big East Player of the Year, Kiyomi Watanabe, three-time SEAG gold medalist, ug Milan Melindo, kanhi IBF junior flyweight champion.
Pasidunggan sab sila si Ekin Caniga sa MMA, William John Riley Go sa karting ug Peter Tyler Po sa golf.
Ang major awardees mao ang mga kandidato alang sa Athlete of the Year award, nga ipahibalo sa mismong adlaw na sa kalihukan.
Sugod ning tuiga, ang SAC motawag sa major awardee sa chess isip Francisco “Boy” Pestano award isip pahinungod sa dugay nang chess columnist kinsa mipanaw sa miaging tuig.
Ang labing unang makadawat ning maong pasidungog mao si Jerish John Velarde, kinsa nakakuha og silver medal sa 2017 13th Asian Schools Chess Championship Under 11 Blitz Category.
Manghatag sab og citations ang SAC sa uban pang mga atleta.