‘NPA’ NGA NASIKOP SA NEGROS TAGA CEBU

Mga miyembro sa New People’s Army, lakip ang usa ka graduate sa University of the Philippines (UP) Cebu sa kursong Mass Communication, nasikop sa 62nd Infantry (Unifier) Battalion inubanan sa 3rd Infantry Division sa Philippine Army kagahapon sa alas 2 sa kaadlawon sa Brgy. Luyang, Mabinay, Negros Oriental.

Lakip sa nasikop ang duha ka menor, kinsa ang usa lumad sa dakbayan sa Mandaue.

Sa wa pa ang operasyon, nakadawat na ang awtoridad og taho gikan sa mga civilian sa Mabinay ug Manjuyod kabahin sa pagsamok-samok ug pagpangilkil sa mga terorista sa Communist Party of the Philippines (CPP)-NPA.

Pinangulohan sa commanding officer sa 62IB nga si Lieutenant Colonel Darrell Bañez, nipadala kini sa iyang tropa sa dapit aron mohimo sa community security patrol.

Dihang naabot sila sa Sitio Tumonon, Brgy. Luyang, giingon nga di mominus sa 20 ka armado nga gituohang mga miyembro sa NPA ang nipabuto kanila hinungdan nga nibawos usab ang mga sundawo.

Human sa 45 minutos, nasikop nila ang unom ka mga NPA diin lakip niini ang babayeng alumna kun graduate nga tinun-an sa UP Cebu.

Ang Central Command (Centcom) sa Armed Forces of the Philippines mihangyong pugngan ang mga ngan sa mga dinakpan.

Nasakmit gikan sa mga rebelde ang unom ka high powered nga mga armas diin lakip niini ang usa ka M16A1, usa ka M16A1 diin nalakip ang M203 Grenade launcher, duha ka M4 Rifles, usa ka VLTOR (M16), usa ka AG 43 (M16), rifle grenades, mga eksplosibo ug uban pang mga gamit.

Usa ka semana ang nakalabay dihang gisunog sa mga terorista ang tractor sa La Castellana ug laing truck hauler sa sugarcane sa Canlaon City.

Samtang si UP Cebu Chancellor Liza Corro nikompirmar nga ang usa sa mga dinakpan graduate sa UP Cebu.

“She is an alumna who graduated last June. We have no information about her current involvements. But I believe she is entitled to due process and is considered innocent until proven otherwise."

Giangkon sa Anak Bayan Central Visayas nga ang usa sa unom ka mga nadakpan ilang sakop kaniadto.

Matod ni Joisa Andrea Cesista, chairperson sa Anak Bayan Central Visayas, nga sukad niadtong Enero 2018 wa na siya makakita sa mao nilang sakop.

Ang mao nga babaye aktibo sa progresibong grupong Anak Bayan apan wala na siya'y contact niini.

Nagtuo si Cesista nga misaka na kini sa bukid ug niabin sa armadong pakigbisog. /