Accreditation sa CT-FEDHOA nameligro
Nameligro ang accreditation sa City of Talisay Federation of Homeowners Association Inc. (CT-FEDHOA) bisan pa og moabot na og usa ka tuig gikan sa ilang pag-apply tungod sa pipila ka babag sa ilang application.
Una niini, ang naasoy nga grupo nanawagan sa pagpailis sa pangulo sa Local Housing Office nga si Rosalie Autor kinsa ilang gisaway nga nipabor sa kaatbang nga pederasyon.
Samtang, ila usab nga gihulagway ang konseho nga gipangulohan ni Bise Mayor Alan Bucao nga bias ug double standard human sila gilisud-lisod sa pagkuha og accreditation nga kinahanglan pang mopaabot silag usa ka tuig sa dili pa i-accredit base sa balaod sa Department of Interiror and Local Government (DILG).
Karong Mayo, takdo nang usa ka tuig gikan sa ilang pag-apply sa accreditation ug mahibaw-an na ang baruganan sa konseho.
Si Konsehal ug Association of Barangay Council President Raul Cabanero, chairman sa committee on accreditation sa konseho, niingon nga mas maayong paabuton na lang sa FEDHOA ang buwan sa Mayo kay pipila naman lang kini ka buwan.
Matod Cabanero nga bisan og wala pa sila ma-accredit, padayon silang nakahimo sa ilang gimbuhaton ug dili nalang magsige'g pamahayag nga bias ang konseho ug double standard.
Si Bucao niingon nga ang iyang papel sa konseho mao lang ang pag-facilitate sa ilang tukion diha sa konseho ug ang desisyon gihapon sa mayoriya ang mopatigbabaw.
Apan miklaro nga bisan pa'g maabot na ang usa ka tuig, dili kini maoy kasiguroan nga makakuha sila'g accreditation gikan sa konseho.
Kini magdepende unya sa rekomendasyon sa committee report ni Cabanero ug sa baruganan unya sa mga konsehal.
Si Bucao nihulagway nga ang konseho nasakitan na sa pagpintal sa grupo og dili maayo ngadto sa mga konsehal ug ila naman kining gikiha ngadto sa Visayas Ombudsman.
“Kana diha, Sir, depende na gyud na sa mga konsehales. Ang ako lang samdan naman gud ang mga konsehales samdan na ba,” matod ni Bucao.
Gihangop sa bise mayor ang pamahayag ni Mayor Eduardo Gullas nga mas maayong maghiusa ang duha ka pederasyon alang sa kaayohan sa tanang homeowners associations sa siyudad.