Comelec Talisay City andam na sa eleksyon karong Mayo 2018

Moabot sa 50,037 ka mga botante sa Sanguniang Kabataan, samtang 128,499 ka mga botante alang usab sa barangay eleksiyon sa dakbayan sa Talisay nga gikatakda karong Mayo 14.

Ang Commission on Elections (Comelec) sa dakbayan sa Talisay nipahibawo nga andam na sila kon mahinayon man ang piniliay sa barangay.

Si Efren Arnejo Jr., assistant election officer sa Comelec sa siyudad sa Talisay, niingon nga ang ila karong gihimo mao na ang pag-imprinta sa registered voters sa tibuok 22 ka barangay sa Talisay.

Base sa labing uwahi nilang record sa kinatibuk-an, niabot na'g 128,499 ka registered voters, apan adunay kapin sa 50 mil ka mga botante alang sa Sangguniang Kabataan (SK).

Matod niya, nga ang ila karong gihimo mao ang paghimo'g information dissemination labot sa umaabot nga eleksyon ug ang pag-awhag sa katawhan sa Talisay nga mogawas ug mobotar karong Mayo 14.

Ang mahimong makabotar sa SK kadtong nagpangidaron og 15 ngadto sa 30 anyos apan, ang mahimong mokandidato mao lang ang nag-edad og 18 anyos ngadto sa 24 anyos.

Hinuon, giklaro sa Comelec nga kadtong 18 anyos ngadto sa 30 anyos ang mahimong mobotar sa SK ug sa barangay nga kandidato, diin hatagan siya'g duha ka balota sa iya unyang pagbotar.

Gipasabot ni Arnejo nga ang mga magtutudlo nga moserbisyo unya sa piniliay dili maglibog sa mga botante kon unsa ang botaran sanglit sa ila unyang listahan sa mga botante aduna may mga timailhan nga mahimo sila makabotar sa SK ug sa barangay election.

Una niini, aduna nay mga magbabalaod sa Kongreso nga gusto na usab nga isibog ang piniliay sa barangay sa ikatulong higayon, adunay gusto nga karong Oktubre o sa Oktubre na sa sunod tuig.

Apan ang Senado ug Malakanyang una nang nipahibawo nga madayon ang piniliay sa SK ug barangay tungod kay wala sila'y nakitang rason nganong kini isibog.

si Arnejo niingon nga ang ilang buhatan igo lang sa pagpangadam madayon man o dili ang piniliay karong Mayo ning tuiga.