Makasanta ba?
Gisugdan na sa Mandaue City ang pagpatuman sa ilang ordinansa nga nagdili sa pagsul-ob og bonnet ug face mask o bisan unsa nga makatabon sa nawong sa nagmotorsiklo. Bisan gani ang pagsul-ob sa helmet nga tinted ang cover sa nawong, gidili usab kay duna silay facial recognition technology nga gigamit apan di magsilbe kon masampungan ang nawong sa tawo.
Nakahukom si Mayor Luigi Quisumbing nga ipatuman kini tungod sa sunodsunod nga mga krimen nga nahitabo sa siyudad sa nangaging mga adlaw. Naglisod ang kapulisan sa pag-ila sa mga kriminal tungod sa pagtabon sa ilang mga nawong.
Ang mao nga ordinansa gisupak sa kinabag-an sa mga magmotorsiklo nga nangaanad nga magtabon sa nawong tungod sa grabeng abog sa mga karsada. Supak sila tungod kay nakuyawan sila nga ang pagdili dunay dautang epekto sa panglawas.
Tinuod man usab nga kasagaran sa mga killer magsul-ob og fullface helmet, mag-bonnet aron di makita ang nawong. Mao nga kasagaran sa pagpatay nasulbad lang pinaagi sa mga sakyanan ug uban pang ebedensya di tungod kay nailhan pinaagi sa nawong.
Maklaro unya kon kining pagdili sa pagsul-ob og tabon sa nawong samtang magmotor epektibo ba sa pagsanta sa mga krimen kay mominos ang mga patay ug tulis ug kon dunay mohimo, mailhan dayon.
Kon magpadayon pa gani kay wa kini tugbangi og kakugi sa mga pulis, mas maayong suspensuhon ang pagpatuman niini.
Mao lagi, ang presensya sa mga pulis ang mas gikinahanglan diha sa kadalanan aron masanta ang pagkahitabo sa krimen, di ang tabon sa nawong.
Ang ehemplo niini mao ang bag-o lang nga pagpatay kang manlalaban Jonnah John Ungab. Wa magpataptap ang killer.
Unta, ning di popular nga lakang sa Mandaue City makapamatuod sila nga kini epektibo batok sa krimen.