Whatever you want

Nagsipok ang akong ulo nga mitabon sa akong dunggan. Nagyawyaw ko. Lawom na ang gabii apan wa gyud ko makatulog. Langas kaayo sila si Papa ug Mama sa pikas kuwarto. Nag-away na sab sila. Nagtupad lang ang among kuwarto. Nadungog ko kaayo ang isog nilang mga tingog.

Ganina ra silang naglalis ug misangpot kini sa ilang panag-away. Ingon na ba lang gyud sila ani kanunay? Wa ba lang sila maghunahuna nako nga nahasol na gyud sa ilang sitwasyon?

“Nganong mipauli ka pa man, Rey? Didto ka na lang unta puyo sa imong babaye!”

Namatikdan nako nga naghilak na si Mama.

“Wa lagi koy babaye, Minda! Kagahi ba nimo pasabton?”

“Way babaye? Huh! Kanunay kang tagdugay mopauli unya nag-unsa ka man sa gawas? May trabaho ba gud sa opisina kon lawom nang gabii?”

“Kapila na tika ingna nga nag-overtime ko? Duna mi giapas nga trabahuon!”

“Overtime? Mao ra gyud kini ang kanunay mong ikatarongan. Bakakon kang dako. Di gyud ko motuo nga kada gabii nga duna moy overtime!”

“Por diyos por santo, Minda! Hunonga na kanang imong pagduda nako. Dako na ang atong anak. Mauwaw ta nga madungog niya nga kanunay tang nag-away! Karon bitaw, alas sayis dia na man ko sa ato. Gihangyo ko ang among manedyer nga di ko mag-overtime tungod anang imong pagduda nako. Pero unsay nahitabo? Giaway gihapon ko nimo!”

Namatikdan nako nga mikalma na si Papa. Di na kaayo siya isog. Hilom kong nakahilak. Bugtong man unta ko nilang anak. Apan morag ang ilang kaugalingon lamang ang gitan-aw. Naluoy ko kang Mama. Apan naluoy sab ko kang Papa. Babaye ko. Sakit gyud kaayo kon luiban sa gimahal nga lalaki. Apan wa may pruyba si Mama nga namabaye si Papa? Basig nagsulti sab sa tinuod si Papa nga nag-overtime siya?

Makalagot gyud ning sitwasyona. Mibangon ko. Gikawhat ko ang akong selpon nga diha sa ibabaw sa gamay nga lamesa sa ulohan sa akong kama. Gitawgan ko si Randy.

“Sunday man ugma, Ran. Magkita ta sa atong abotanan.”

Maayo gani kay nakamata si Randy sa akong pagtawag niya.

“Sige. Hapon lang kay manimba ta.”

Nakaginhawa kog lawom pagkahuman namog estorya sa akong boyfriend.

(SUMPAYAN)