CURRY NAANGOL
Nakasugakod ang Golden State Warriors bisan sa limitadong oras ni Stephen Curry sulod sa korte ug ilaha gihapong nabuntog ang host atlanta Hawks, 114-109, kagahapon sa National Basketball Association (NBA).
Ang two-time MVP nga si Curry nakapupo og 28 puntos lakip na niini ang 15 sa katapusang pito ka mga minutos sa 1st half human kini mibalik og duwa gikan sa pagkaangol sa iyang tuo nga tiil.
Si Curry mibiya sa duwa human kini naangol sa 1st quarter. Sa pagbalik ni Curry, nagmangtas kini ug nagpauwan kini’g sunodsunod nga puntos sa 2nd quarter.
Apan nakadesisyon si Warriors coach Steve Kerr nga dili na patiwason og duwa si Curry sugod sa 3rd quarter aron dili mograbe ang pagkaangol niini.
“Basically their call,” batbat ni Curry. “Frustrating, but big picture, I understand . ... I don’t think it’s going to be anything that will keep me out.”
Gipasabot ni Kerr nga sa dihang nagtakiang og gamay si Curry sa 3rd quarter, nakadesisyon siya nga dili niya irisgo ang iyang pambatong pointguard.
“He wanted to stay in but we didn’t want him to stay in just because of the potential to make it worse,” pasabot ni Kerr.
Si Kevin Durant nipupo sab og 28 puntos alang sa Warriors, niamot og 16 puntos si Nick Young samtang nihatag og 15 puntos si Klay Thompson.
Si Dennis Schroder, kinsa nihatag og 27 puntos alang sa Hawks, nakapasulod og duha ka freethrows aron pahakan ang labaw sa Warriors, 109-111, sa himatyong mga segundos.
Sa return play, nakapasulod og usa ka freethrow si Durant aron inaton og gamay ang labaw sa Warriors, 112-109, una nailugan og bola ni Andre Iguodala si Kent Bazemore aron mugnaon ang katapusang puntos sa duwa. “Kent lost the ball and it just fumbled to me,” batbat ni
Iguodala.
Ang Hawks gipangulohan ni Bazemore pinaagi sa iyang career-high nga 29 puntos.
“It was the first time I’ve had fun in a while,” asoy ni Bazemore. “The season being what it’s been, I’ve kind of been frustrated... That’s not who I am and that’s not what got me here.”
Sa laing mga duwa, ningdaog ang Orlando Magic batok sa Detriot Pistons pinaagi sa overtime, 115-106, Philadelphia 76ers batok Charlotte Hornets, 110-99, Chicago Bulls batok Dallas Mavericks, 108100, Denver Nuggets batok Memphis Grizzlies, 108-102.
Ninglampos sab ang Indiana Pacers batok Milwaukee Bucks, 103-96, Toronto Raptors batok Washington Wizards, 102-95, Oklahoma City Thunder batok Phoenix Suns, 124-116, LA Clippers batok New York Knicks, 128-105, ug Utah Jazz batok Minnesota Timberwolves, 116-108./