Mga tanod ipangdestino sa NRA
Butangan og mga tanod ug mga kawani sa clean and green sa dakbayan sa Mandaue ang North Reclamation Area (NRA) aron adunay mobantay sa seguridad, kalimpyo ug trapik sa giisip nga special economic zone sa dakbayan.
Kini maoy gipahibalo ni Mayor Luigi Quisumbing lakip na sa bag-ong gitudlo niini nga manager sa NRA ug assistant city administrator Marvin Soco atol sa usa ka press conference kagahapon.
Matod ni Quisumbing nga upat ka mga intersection sa NRA nga mao ang intersection sa Larazzabal Drive, Bai- Parkmall intersection, Mahiga Creek, ug Mareco intersection ang ilang butangan og mga tanod 24/7.
Gawas sa tanod, ila sab kini pabutangan og mga tiglimpyo sa palibot ug riders nga mopatrol sa maong mga dapit.
Sa dihang nahinabi sa mga tigbalita, si Soco nagkanayon nga ang mga tanod didto kuhaon sa Janitorial and Security Services Unit (JASSU) ubos sa Department of General Services (DGS) sa dakbayan sanglit wa may opisyal nga barangay nga nakatag-iya sa NRA.
Ang mga kawani ipaubos unya og mga pagbansay alang sa ilang bag-ong responsibilidad nga kabahin sa pwersa nga mo-monitor sa kalihukan sa NRA.
Ang dry run sa maong tahas, pagahimuon unya sa kagamhanan sa dakbayan karong buwana.
Gawas sa bag-ong mga kawani, buot sad ni Quisumbing nga palapdan unya ang pwersa sa CCTV camera sa NRA.
Ang mayor niingon nga butangan ang mga entry ug exit points sa NRA og CCTV tungod sa hulga sa seguridad sa dapit.
Ang pagkatudlo ni Soco isip manager sa NRA gituyo ni QUisumbing aron dali nga mahatagan og solusyon ang mga problema nga nasinati sa mga establismento dinhi.
There’s a lot of activities going on in NRA which is considered the ‘commercial and industrial center of Mandaue’. I think it is about time for us to at least monitor.”
- Marvin Soco Assistant City Administrator