UC juniors kampyon sa Cabanero Cup Inter-HS
Gipukan sa University of Cebu (UC) Baby Webmasters ang University of San Jose Recoletos (USJR) Baby Jaguars, 55-51, aron langkaton ang korona sa 3rd Bulacao Brgy. Captain Raul Cabanero Cup Inter-Secondary basketball tournament sa miaging gabii sa Bulacao Sports Complex ning dakbayan.
Ang Baby Webmasters ningsubay sab og pagpanghudlat una nila napukan ang Baby Jaguars.
Kontrolado sa Baby Webmasters ang sayong bahin sa kombati ug nakaposte sila og 31-21 nga labaw.
Hinayhinay nga ninggukod ang Baby Jaguars pagsugod sa 3rd quarter apan nagpakalig-on ang Baby Webmasters sa hinapos nga bahin aron angkunon ang kalampusan.
Gipasabot ni Baby Webmasters coach Joever Samonte nga nakuha nila ang kadaugan pinaagi sa depensa.
“Sa deffense gyud gidaog nako. Grabe ang among depensa nga gi-apply, full court man-to-man trapping defence,” matod ni Samonte.
“Nalipay gyud ko sa akong players kay gisunod nila akong system.”
Ang Baby Webmasters nakabulsa og P25,000 nga ganti isip kampiyon samtang ang Baby Jaguars nakakuha og P15,000 nga premyo.
Sa inilugay sa ikatulong dapit, gipangmakmak sa University of the Visayas (UV) Baby Green Lancers ang University of Southern Philippines Foundation (USPF) Baby Panthers, 94-78.
Ang liga gipasiugdahan ni Brgy. Captain Raul Cabanero inabagan sa ihang mga konsehal nga sila si Banjo Abastillas, Darwin Cabanero ug Agnes lastimosa.
Ang technical committee gipangulohan ni Edwin Dejacto. 1st game:
UV (94) - Cometa 49, Yerro 14, Villamayor 14, Rosete 7, Fua 5, Amistoso 3, Paraldo 2. USPF (78) - Ochavo 25, Montemayor 11, Oyao 10, Maglasang 8, Achacoso 8, M. Singson 6, D. Singson 5, Cabatingan 5. Total 78. Q.score 15.26.22.15./ 2nd game
UC (55) - Peligrino 13, Orquez 12, Parantar 5, Gellacone 5, Cuyos 5, Pacana 4, Ordineza 4, Senagan 3, Villasan 2, Delgado 2. USJR (51) - Ando 21, Gonzaga 10, Leonora 6, Echavez 6, Ranara 4, Pepito 2, Guibao 2.