5 PATAY SA PAGHUGNO
LAING 55 NAANGOL KAY NATABUNAN SA BUNKHOUSE
Lima ang nangamatay samtang 55 ang nangaangol sa pagkahugno sa bunkhouse sa JE Abraham Lee Construction sa Archbishop Reyes avenue, Barangay Luz, siyudad sa Sugbo.
Ang lima mao silang Iveen Villarin, 23, taga Langtad, syudad sa Naga; Francisco Diapera, 45, taga sitio Pag-asa, Lutopan, Toledo City; Carlos Caliwa, 60, taga Negros Oriental; Crisenciano Silomen, 57, taga Kauswagan, lungsod sa Trinidad, Bohol; ug Jason Bacalso, 22, taga Langtad, syudad sa Naga.
Adunay 55 usab ka mga tawo ang naangol, upat niini
serious og kadaot sa lawas, pito ang kinahanglan sa dinalian nga medical assistance samtang 44 ang nakaangkon lang og minor injuries.
Alas 2:57 kagahapon sa kaadlawon nabantayan sa gwardya nga si Amancio Agujo Jr., sakop sa Standout security nga dunay kuto-kuto sa mga dapat nga scaffoldings ug midiretso og katumba human mabali ang mga puthaw.
Nadungog pa niya ang pagpaninggit sa mga construction worker, uban niini nga naa sa tunga-tunga nangaipit ug gipangdali sa pagbira, apan ang uban nagrabihan human madat-ogi sa bug-at nga puthaw.
Sa log book ni Agujo, 153 ka mga trabahante ang nangatulog sa bunkhouse nga dunay upat ka deck o level.
NALAB-ANAN?
Nagsugod si Agujo sa pagbantay sa bunkhouse sukad pa niadtong Septiyembre 2017 apan wa siyay namatikdan nga problema sanglit di molapas sa 100 ang matulog sa barracks.
Niadtong miaging adlaw nangabot ang upat ka grupo nga gi sub contract sa JE Abraham Lee Construction nga iyang gibana-bana nga halos moabot og 100.
Dinhi na matod pa nagsugod nga daw sa mauyog na ang bunkhouse.
“Daghan kaayo nangabot kagahapon, Sir, kay sa akoa lang naobserbaran inig saka ana nila, mag-uyog-uyog,” asoy ni Agujo.
Ang project engineer sa JE
Abraham Lee Construction Butch Abaya nihimakak nga
overloaded ang bunkhouse sanglit gi design kini sa 200 ka tawo ang kapasidad.
Gipasabot ni Abaya nga lig-on ang gitukod nilang bunkhouse.
Gani mahimong makasaka ang kapin sa 200 ka mga tawo. Lig-on usab ang foundation niini tungod kay dunay puthaw nga maoy patungan sa haligi nga mga scaffoldings nga nagsilbing sapatos.
“Lig-on kaayo na kay naa man nay sapatos unya giabagan og kabilya. Stable na siya kay dili man taas kaayo kay sa among initial nga tan-aw ani, maora man nig natulod ba o naligas pero amo pa ni ipasusi,” matod ni Abaya.
Nipasalig usab ang kompanya nga moabag sila sa pamilya sa mga nakalas lakip na ang ayuda sa mga naangol nga nagpabilin pa sa tambalanan.
Sa ilang opisyal nga pamahayag, ang kompaniya niingon nga ilang gikasubo ang nahitabo. Ilang prayoridad ang pagasikaso sa mga nangaangol ug medical nilang panginahanglan.
Nag-abag usab sila sa mga pamilya sa nangamatay ug giatiman bisan kadtong wa mangaunsa.
“Meanwhile, we are now investigating the incident to determine its cause and the circumstances that led to it. We will cooperate with the authorities in their own investigation,” matod sa kompaniya sa ilang pamahayag.
Ilang gitataw nga kanunay silang nagtan-aw sa kaluwasan sa ilang mga trabahante. /