DepEd official, kapitan ipangkiha

Pasakaan og kaso si Talisay School Division Supt. Leah Noveras ug barangay Kapitan Teodoro Belleza sa barangay Poblacion human kini gipa-blotter sa laing opisyal sa school division ngadto sa Talisay Police Station tungod sa giingong pagpang-harass ngadto sa nauwahi.

Si Supt. Noveras, sa iyang bahin, wala mahadlok sa hulga ug miingon nga andam kini niyang atubangon tungod kay siya nagtuo nga sakto ang iyang gihimo.

Nagsugod ang kagubot human giingong gustong ibalhin ni Noveras si Mrs. Maria Lourdes Ipong, pangulo sa Curriculum Implementation Division sa Dep-Ed Talisay City.

Gusto ni Noveras nga ibalhin si Ipong sa iya gyud mismong departamento sanglit ang iyang giukopahan karon mao man ang buhatan sa Finance Office.

Sa una niining suwat gihatagan siyag napulo ka adlaw sa pagbakanti sa maong buhatan hangtod nga niabot og usa ka buwan ug lima ka adlaw ang mao niyang kamandoan apan wa gayod mobalhin si Ipong.

Apan si Ipong, sa iyang bahin, miingon nga sa duha ka mando ni Noveras iya usab kining gitubag og gihangyo nga kon mahimo mapangitaan siyag mas dako nga opisina kay alang kaniya gamay ra ang maong buhatan.

Apan wala gyuy tubag si Noveras hangtod nga didto na siya nagpakitabang sa buhatan sa Civil Service Commission (CSC).

Niadtong Lunes sa hapon mao nalay iyang naabtan nga nagawas na ang iyang mga butang sa iyang opisina ug aduna nay nag-ukopar niini nga laing mga kawani.

Nasayran ni Ipong nga ang pagkuha sa iyang mga butang gisaksihan ni Kapitan Belleza sa Poblacion ug mga tanod nga wala gyud siya pahibaw-a.

Gikuhaan man tuod kini og mga hulagway sa kapitan apan wala tagsa-tagsaa sa pag-record kon unsa may mga butang nga nakuha gikan sa iyang opisina.

Hinungdan nga siya nakahukom sa pagpa-blotter sa hitabo tungod kay iyang pasakaan og kaso si Noveras ingon man si Kapitan Belleza.

Hinuon si Noveras nagtuo nga sakto ang iyang gihimo. Iyang gipasabot nga sunod semana mo-sugod na og duty ang lima ka mga kawani nga iyang gikuha alang sa ilang finance office.

Matod ni Noveras nga dili dako ang ilang division hinungdan nga dili dako usab ang ilang lugar sanglit wala paman niabot ang budget nga iyang gipangayo alang sa expansion sa Talisay Division.

Nasayran nga si Noveras mipasakag kasong graft and corruption ngadto sa Visayas Ombudsman batok ni Ipong.

Samtang gipahibawo usab ni Ipong nga ning pipila ka adlaw gikan karon mopasaka usab siyag kaso nga graft and corruption batok ni Noveras ngadto sa Ombudsman.