Upat ka mayor, ABC pres gireklamo; Magpale di interesado moimbestigar
Hunta Probinsiyal gimanduan sa Office of the President pag-imbestigar sa laing lima ka mga reklamo batok sa pipila ka mga opisyal dinhi sa Sugbo, nga nadawat pinaagi sa 8888 Citizens’ Hotline and Complaint Center.
Bise Gob. Agnes Magpale nanghinaot nga dunay matukod nga specific nga opisina nga maoy moatiman sa maong mga reklamo ug dili kini ihan-ok tanan sa Sangguniang Panlalawigan.
Upat ka mayor ug usa ka pangulo sa Association of Baranga Council (ABC) dinhi sa Sugbo ang giduso sa Malacanang nga ipaimbestigar sa buhatan ni Bise Gobernador Agnes Magpale.
Sagad sa mga reklamo, nag-alegar ug anomaliya o kahiwi-an batok sa maong mga opisyal.
Gipasabot ni Magpale nga base sa ilang house rules, dili mo-entertain ang Hunta Probinsiyal ug mga reklamo, kansang mga reklamante wala personal nga nipatim-aw sa ilang buhatan alang sa maong katuyuan.
Naglibog ang opisyal kon unsaon nila pag-atiman sa maong reklamo, ilabi na nga duna pay mas nag-una niini nga anaa na daan sa Committee on Complaints and Investigation sa Sangguniang Panlalawigan.
Kinahanglan pa usab nila’ng masuta kon tinuod ba gyud ang mga personalidad nga nangreklamo.
“We don’t even know if they are real,” matod si Magpale.
Nabalaka si Magpale nga kon magpadayon ang pagabot sa mga reklamo gikan sa 8888 diha sa Hunta Probinsiyal, hayan nga dili na unya sila makahimo sa ilang mga naandan nga gimbuhaton ug responsibilidad.
Nunot niini, nanghinaot siya nga magtukod og linain nga opisina ang president aron lang pag-atiman sa mga reklamo nga madawat sa Citizens’ Hotline and Complaint Center ug dili na kini ipasa ngadto sa mga lokal nga opisyal.
“I’m not saying we should discourage people from reporting (to 8888) but there should be a venue or an office to treat this, maybe not the Sangguniang Panlalawigan,” pasabot ni Magpale.