Boundary system sa mga driver posibling usbon

Ang naandan nga “boundary system” sa pagpamasada og public transportation gikinahanglan nang usbon human gitumbok sa Dangerous Drugs Board (DDB) nga kini maoy usa sa hinungdan nga adunay pipila sa mga drayber ang mogamit og illegal drugs.

Si Julieto Flores, presidente sa mini bus operators sa Sugbo, way supak kalabot niini.

“Whichever the better, okay ra ko kay naa man ta sa public service,” tipik sa pamahayag ni Flores.

Nangunay si Undersecretary Benjamin Reyes sa Dangerous Drugs Board (DDB) sa gipahigayon nga Drug Abuse Prevention Program for Transport Groups seminar kagahapon sa Dohera Hotel, dakbayan sa Mandaue.

Siya naglaraw nga angayan nang usbon ang pagpatuman sa boundary system nga ipahamtang sa mga operator ngadto sa ilang (mga) drayber.

“Yung drivers na nag- wo-work 24 hours, di yun tao,” dason ni Reyes ngadto sa 84 ka mga jeepney, bus ug taxi drivers nga mitambong sa maong tigum.

Pulong pa sa opisyal nga gikinahanglan nga sulod lamang sa walo ka oras ang pamasada kini aron adunay igong panahon ang usa ka drayber nga makapahuway.

Nasuta nga tungod sa boundary system mogamit og illegal drugs ang ubang drayber aron makapadayon sa pamasahero nga dili bati-on og kakapoy taliwala sa taas nga oras sa pagmaneho.

Sa susamang kalambuan, si Flores nipasabot nga adunay duha ka matang sa “boundary system”, adunay per round ug adunay uban nga nagdawatan og sweldo.

Nasayran nga sagad sa boundary system ipatuman sa higayon nga ang usa ka operator daghan og unit nga pa-abangan.

Gipahibawo sab ni Flores nga wa na kaayoy bus driver nga drug user kini base sa ilang data nga iyang gitamdan kay matag tuig gi-require ang tanang drayber nga mopa-ubos sa drug test nga gihimo nilang kabahin sa operational requirement.