Ang Asawa ni Manoy Leon
Si Manoy Leon bugtong nakong igsuon. Overseas Filipino Worker siya sa Japan isip electronics engineer sa usa ka computer company didto. Pag-gradwar niya sa maong kurso nakapasar dayon siya sa electronics engineering board nianang tuiga ug nadawat dayon sa unang kompaniya nga iyang gi-aplayan kay sa resulta siya ang top 3 sa mga nakapasar. Ako mo-gradweyt pa karong Marso sa Senior high school sa UC.
Mikuyog kong Mama Anita nga misugat kang Manoy Leon airport sa MCIA, Lapu-Lapu City. Tulo na siya ka tuig didto sa Japan. Mobakasyon siya karon sa Sugbo og usa ka buwan. Sa iyang ‘Skype’ kang mama, kuyog niya ang iyang asawa nga Haponesa.
Didto sa airport gipaila-ila ni Manoy Leon kanamo ni mama si Akira, ang iyang asawa. Matahom si Akira; taas ang iyang itom nga buhok ug puti ang pamanit nga hamis kaayo sa akong obserbasyon. Hikot ang iyang mga mata sama sa ubang Haponesa nga nakita nako sa Japanese movie sa TV, ug pula kaayo ang lipstick sa iyang mga ngabil. Namatyagan sab nako nga hilumon si Akira. Iningles ang iyang sinultihan nga usahay may sagol Hinapon nga mga pulong.
“Honey, this is my brother Betoy,” ni Manoy Leon.
“How are you, Betoy?” ni Akira nga hinay nga mitunol sa iyang tuong kamot ngari nako.
“I’m okey, Nang Akira,” tubag ko nga milamano kaniya. Nabatyagan nako nga dili lumoy ang mga tudlo ni Akira. Dili parehas sa kang Merlyn nga akong klasmeyt. Medyo may kagahi kini sama sa goma apan hamis.
Si Manoy Leon maoy kanunay nga nakig-estorya kanamo di-
hang nagsakay na mi sa usa ka yellow taxi paingon sa among balay sa Guadalupe.
Apan nahibulong ko kang Akira. Dili siya modungan kanamo panahon sa tingkaon: pamahaw, paniudto, panihapon. “Ako lang siyang dad-an sa among kuwarto og pagkaon. Manggiulawon kaayo na siya,” mao kanunay ang isulti ni Manoy Leon kanamo ni Mama Anita. Usahay sa oras sa tingpanihapon mananghid si Manoy nga adto sila mag-dinner si Akira sa gawas, kay paborito gyud sa iyang asawa ang Japanese food. Usa pod nga nakapatingala nako kay panagsa ra siya moapil namo ni Mama Anita ug Manoy Leon nga manan-aw og TV panahon sa gabii. Hinuon, nabati ko siya nga mokatawa panagsa kon may gikahimut-an siya sa among gitan-aw nga comedy show.
Ang nahibiling mga adlaw sa bakasyon ni Manoy Leon gigugol niya sa pagpanuroy uban kang Akira. Nangadto sila sa Boracay, sa Palawan, sa Kalanggaman Island sa Leyte, sa Sumilon Island sa Oslob, sa Alona Beach sa Panglao, Bohol, ug sa uwahi, sa Malapascua Island sa Daanbantayan.
Karong semanaha, sa adlaw nga Sabado, gitakda nga mamalik na sa Japan si Manoy Leon ug si Akira.
Usa ka halawom nga gabii miadto ko sa CR aron pagtuman sa usa ka sugo sa lawas dihang misakit ang akong pus-on. Gikan sa CR nahiagi ko sa kuwarto ni Manoy Leon. Sugo sa ka-usisero naminaw ko sa kinasikas didto sud sa lawak.
“I love you, Akira, darling! Let’s make love tonight!” nabati ko nga namulong si Manoy Leon. “Yes, Leon. I love you, too!” tubag ni Akira. Milili ko sa lungag sa yawehanan sa pultahan. Mibudlat ang akong mga mata sa akong nakita. Gihuboan ni Manoy Leon sa sapot pangkatulog si Akira. Nakita ko ang ka-seksi niini. Unya gihapuhap ni manoy ang dughan ni Akira. Ang mga kamot ni Akira mikapyot sa liog ni manoy nga migakos og hugot sa lawas sa iyang asawa. Naghalok sila lips-to-lips. Unya nanghigda sila sa kama. Nakita ko ang ilang gibuhat. Human sa pipila ka gutlo, nanindog sila gikan sa kama. Nakita ko nga gihpuhap na sab ni Manoy Leon ang dughan ni Akira. Wa molihok si Akira. Gisul-oban siya ni manoy sa iyang sapot pangkatulog. Dayon gipahigda sa kama. Si manoy dali nga misul-ob pagbalik sa iyang padyama. Dayon midulog paghigda sa iyang asawa.
Misantop sa akong hunahuna: Robot si Akira, sex toy nga ginama sa usa ka computer company didto sa Japan. Nakabasa kog artikulo sa Philippine Times bahin ning mga robot nga mora gyud og babaye ang pamayhon ug gi-program nga makasulti ug makahimo paghatag og lawasnong kalipay sa lalaki. May feature sab sa TV akong natan-awawan diin ang proto-type niini morag manikin.
Pagka Sabado gihatod namo ni Mama si Manoy Leon ug si Akira sa MCIA kay mobalik na sila sa Japan. (KATAPUSAN)