NLEX, GIN KINGS SEMIS ANG TUYO
Mga duwa karon
4:30 pm- Ginebra batok Rain or Shine
7:00 pm- Alaska batok NLEX
MOSUWAY pagsulod sa semi-finals ang NLEX Road Warriors ug Brgy. Ginebra Gin Kings sa ilang pagpakigbatok og lainlaing kontra sugod karong hapon sa Game 2 sa duha ka mga best-of-three quarter-finals series sa Philippine Basketball Association (PBA) Philippine Cup sa Araneta Coliseum.
Ang Road Warriors makigbatok sa Alaska Aces sa main game sunod sa pagpakigbatok sa Gin Kings sa Rain or Shine Elasto Painters sa premirong duwa.
Ang Road Warriors naglaom nga magbangis ang Aces ning higayuna sa tinguhang makapugos og deciding Game 3 apan andam sila niini.
Munasginahawang mingdaog ang Road Warriors sa Game 1, 105-99, niadtong Lunes sa pagpangulo sa ilang pambatong rookie nga si Kiefer Ravena, kinsa nagpauwan og 25 puntos sa maong duwa.
Ang kadaugan karon sa Road Warriors mao ang makapasulod kanila sa bestof-seven semis series sa labing unang higayon sukad ilang napalit ang prankisa sa Air 21 Express niadtong 2014.
Giangkon ni Road Warriors coach Yeng Guiao nga naghinamhinam na ang iyang mga magduduwa nga makasulod sa semis apan iyaha kining gipahimangnuan nga dili magpadala niini.
“I’m just relieved that Game One is over - that’s the good news. The bad news is we have to go through this again,” batbat ni Guiao sa PBA.ph.
Sayod si Guiao nga dili bastabasta moisa sa ilang bandera ang Aces.
“NLEX is a tough and talented team. We will have to be great defensively from start to finish and make great decisions with the basketball,” matod ni Alaska coach Alex Compton.
Sa ilang bahin, ang Gin Kings ninghubog sa Elasto Painters, 88-80, sa premirong duwa sa ilang kaugalingong series.
Ikaduha kining sunodsunod nga kadaugan sa Gin Kings batok sa Elasto Painters sunod sa ilang tulo ka mga overtime nga kadaugan, 100-82, niadtong Biyernes atol sa katapusang adlaw sa elimination round.
Sayod si Gin Kings coach Tim Cone nga dili lalim ang paglupig sa Elasto Painters sulod sa tulo ka sunodsunod nga higayon hinungdan nga kinahanglan pa nilang mokayod og maayo.
“We wanted a leg up on this series and we did. (It) doesn’t guarantee us anything. Hopefully we’d come with a 0-0 mentality on Wednesday,” matod ni Cone.
Matod ni Elasto Painters coach Caloy Garcia nga bisan naggukod sila sa series, malaumon gihapon sila kabahin sa ilang poruhan sa series.
“I just told the players, it’s not yet over. We’re playing one of the best teams in the league, but we’re still keeping everything positive right now,” batbat ni Garcia.