WALA SI IRVING, WA’Y PROBLEMA
Bisa’g wala ang ilang lider nga si Kyrie Irving, ang Bostoc Celtics nakamaneho gihapon paglampornas sa host Chicago Bulls, 105-89, kagahapon sa National Basketball Association (NBA).
Aron matapakan ang hawang sa pagpadaplin ni Irving, ang Celtics ningmugna og balanseng ataki sa pagpangulo ni Jaylen Brown, kinsa nagpakatap og 21 puntos.
Wala moduwa si Irving aron ipahuway ang iyang nagsakit nga wa nga tuhod.
Lab-as pa sa panumdoman sa Celtics dihang miasdang sab sila sa balwarte sa Bulls niadtong Disyembre nga wala gihapon si Irving diin grabeng kastigo ang ilang nasinati.
Ning higayuna, gipaneguro sa Celtics nga dili na kini mahitabo pagbalik ug mabangis nga panimalos ang ilang gihimo ngadto sa Celtics.
Ang Celtics sayong mingratsada hangtod nga nakaposte sila og 37 puntos nga labaw sa usa ka higayon sa kombati ug mingderetso na sila paingon sa kadaugan.
Gipasabot ni Brown nga paingon ning duwaa, nagpilit na sila sa ilang alimpatakan nga kinahanglang dili sila mausban og kastigo sa Bulls ug ipakita nga kaya nilang mobarog bisan wala ang ilang lider.
“Kyrie didn’t play last time (and) they felt like they could beat us and they did beat us by 20-plus points,” paghinumdom ni Brown sa nahitabo niadtong Disyembre.
“Coming into this game we had the mindset we needed to get out on them early and we did that.”
Si Jayson Tatum nidugang og 14 puntos samtang niamot og 13 puntos matag usa sila si Al Horford ug Terry Rozier alang sa Celtics.
Gawas lang kang Semi Ojeleye, ang tanang mga magduduwa sa Celtics nakatampo sa ilang opensa.
“We were ready to play,” batbat ni Celtics coach Brad Stevens. “Our defense was really good in the first half, obviously. I thought we were really flying around, covering for one another, playing the right way. And then we were aggressive in taking the ball to the basket. That opened up some 3s.”
Si Denzel Valentine nimugna og 20 puntos lakip na niini ang upat ka three-point shots alang sa Bulls apan mao ra kini ang positibong nahitabo alang kanila.
“They made us uncomfortable, things got tough and we just shut down,” matod ni Bulls coach Fred Hoiberg. “We quit playing.”
Ang usa sa mga pambato sa Bulls nga si Zach Lavine miingon nga grabe ka bati ang ilang duwa.
“There’s no excuse for what we did out there,” matod niya.
Sa laing mga duwa, ningdaog ang Cleveland Cavaliers batok sa Detriot Pistons, 112-90, Indiana Pacers batok Milwaukee Bucks, 92-89, Miami Heat batok Phoenix Suns, 125-103, San Antonio Spurs batok Memphis Grizzlies, 100-98, Utah Jazz batok Orlando Magic, 94-80, ug Portland TrailBlazers batok LA Lakers, 108-103.