NGANONG NAHUGNO ANG BUNKHOUSE?

linog ang usa sa pasangil sa Abraham C lee Construction & Development Corp. nga rason sa pagkahugno sa bunkhouse sa ilang mga construction worker sa may Archbishop reyes Avenue, barangay luz, dakbayan sa Sugbo nga nikalas sa lima ka mga trabahante.

Kini gawas sa nangawagtang nga clamps sa steel bars nga mao’y mokupot aron lig-on ang gitukod nga bunkhouse. Kagahapon, usa ka technical conference ang gipatawag sa Department of Labor and Employment (Dole) 7 diin mismo ang presidente sa maong contruction company nga si Abraham Lee ang niatubang kang officer-in-charge Regional Director Cyril Ticao, inubanan sa ilang structural engineer ug project manager. Gisuwayan usab sa tigbalita pagkuha sa habig ni Lee, apan ang tubag niini, “No, Thank You.”

Human sa conference, matod ni Ticao, nga usa sa pamahayag sa construction company nga daw naglinog hinungdan nga nahitabo ang pagkahugno.

Base sa pakisusi sa Superbalita Cebu sa datus sa Philippine Institute of Volcanology and Seismology (Phivolcs) niadtong Martes sa kaadlawon, 2:43 adunay 2.1 magnitude sa sidlakan sa Baras, Catanduanes sa Luzon area.

Dugang ni Ticao nga nipasalig na ang kompaniya nga moabag sa bayrunon sa tambalanan ingon sa gastohan sa pamilya hilabi na kadtong namatyan.

Nakita atol sa pakisusi sa labor laws compliance officer sa Dole 7 nga nakalapas ang kompaniya sa General Labor Standards (GLS) diin naglakip kini nga wala’y coverage ang mga trabahante sa Social Security System (SSS), Philhealth ug Pag-ibig. Ingon man aduna’y mga underpaid, wa’y overtime pay ug wa bayari sa night shift differential.

Giingon pa saconstruction company nga sub-contractor ang kasagaran nga wala niini ug aduna daw mga trabahante nga wa pa makasumiter sa ilang mga gikinahanglan nga dokumento.

Nakita usab base sa Occupational Safety and Health Standards (OSHS) nga wala’y Dole accredited safety practitioner, construction safety and health program ug way aprobado nga structural analysis for the temporary structure, ug uban pa ang kompaniya.

Nipasalig ang kompaniya nga mosumiter sa ilang accident report ugma, Biyernes, lakip na ang structural analysis and design.

Tagaan og 10 ka adlaw ang kompaniya nga motuman sa labor laws samtang 30 ka adlaw alang sa OSHS.

Angay usab nga padayon nga sweldohan ang mga kawani bisan kon nahunong ang pagtrabaho base na usab sa department order 13 sa Dole. /

/ AMPER CAMPAÑA ■ NAHUGNO: Mga rescuer mikarga sa usa sa mga biktima sa pagkahugno sa bunkhouse sa Abraham Lee Construction sa Archbishop Reyes Avenue dakbayan sa Sugbo. Gibasol sa kompaniya ang pagkahanaw sa steel clamps nga nakapahuyang sa bunkhouse.