Tomas pabor sa adhoc com
Pabor si Mayor Tomas Osmeña sa pag-umol sa City Council og ad hoc committee nga gilangkuban sa lima ka konsehal aron maoy moutingkay sa P18 bilyones nga tanyag sa pagpalambo sa walo ka ektarya nga Kawit island.
Si Osmeña gusto nga mapaspasan sa konseho pag-aproba ang maong tanyag sanglit nagsingabot na usab ang bidding sa tulo ka ektaryas nga luna sa South Road Project (SRP) nga adunay inisyal nga P110,000 nga balor ang matag metro kuwadrado. “That’s okay particularly because all the other councilors and the public can attend. It’s transparency that’s important,” padayag ni Osmeña.
Ang mayor nihulagway nga kon makasugod na og trabaho ang kompaniya nga gipanag-iya ni John Robinson Gokongwei sa Kawit island, makapataas kini sa kantidad sa yuta nga wala pa mahalin sulod sa 300 ektaryas sa maong luna.
“Very much. I want to play up this project because we will be bidding out the three hectares very soon. I waited for this project,” tubag ni Osmeña. Ang mayor nagkanayon nga gikinahanglan nag dugang pundo para sa City Government sanglit aduna siyay bag-ong nakita nga prayoridad nga mao ang pag-abli og daghang public library para sa mga tinun-an sa dakbayan.
Plano niya mao ang pagtukod og library sa ikaduhang andana sa Ramos Public Market, T. Padilla public market, Unit II sa Carbon public market ug sa Taboan nga gibanabana nga mogasto kini og P100 milyones.
Ang konseho, atol sa ilang regular session niadtong Martes, nitudlo kang Konsehal Renato Osmeña Jr., isip chairman sa ad hoc diin iyang gikauban si Konsehal Raymond Garcia, Joey Daluz sa Team Rama ug silang Konsehal Margarita Osmeña ug Sisinio Andales sa habig sa Bando Osmeña Pundok Kauswagan.
Ang mga konsehal sa administrasyon ug sa opposition nagkasinabot nga susihon ang proposal sa Universal Hotel and Resorts Inc. diin ila kining gamiton sulod sa 50 ka tuig bugti sa percentage nga madawat sa dakbayan sa ilang gross sales ug rentals.
Ang mayor unang nibutyag nga bahinan ang City Government og 10 percent sa ilang gross rentals ug laing dos ngadto sa 3 porsiyento sa ilang gross sales, way labot sa ilang real property, business tax ug ubang regulatory fees.