Mibayad og buhis sa Cebu City
Mibayad kagahapon og P300,568.50 ang J.E Abraham C. Lee Construction and Development Corp., ngadto sa City Treasurer’s Office sa kagamhanan sa siyudad sa Sugbo human nibahad si Cebu City Mayor Tomas Osmeña nga pasirhan kini tungod kay giingong nag-operate nga way permit.
Ang construction firm nideposito usab og P45,000 isip bayad sa overtime, night premium ug underpayment sa lima o unom ka mga trabahante niini nga naapil sa pagkahugno sa upat ka deck nga bunkhouse nga nikalas og lima ka kinabuhi, pagtug-an ni Department of Labor and Employment 7 Officer-in-charge director Cyril Ticao. Nakaduso na usab og incident report kagahapon sa hapon ang J.E. Abraham C. Lee Construction and Development Corp., sa Dole 7, apan wala pa kini mabasa ni Ticao.
Sumala sa director nga nisugyot ang construction firm nga maggamit og container
vans nga maoy pahulayanan o katulganan sa mga trabahante, apan kini ila pang inspeksyunon sa dili pa itugot ang pagpagamit.
Hinabion usab nila ang ubang mga trabahante kon duna bay wa mabayri og overtime ug night premium sa kompaniya.
Sa record sa CTO, nagpakita nga dunay way mabayran nga buhis ang construction firm nga nagkantidad og P351,000 ug P87 mil lang ang gihatag nga partial payment niadtong Enero 30, 2018.
Matod ni City Treasurer Veronica Morelos nadiskobrihan nila ang tax delinquency sa kompaniya diha naghimo sila og evaluation sa miaging tuig. Sa suwat ni Tetta Alejandria, chief financial officer sa construction firm kang Morales, kini nipasabot nga wa sila mobayad sa kantidad sanglit ubos pa kini sa protesta sanglit nagpadayon pa ang auditing sa ilang external auditor.