Edipisyo sa PRC giinagurahan
Sa pag-inagurar sa bag-ong gipanindot nga edipisyo sa Philippine Red Cross Cebu Chapter, makalaom ang mga tawo nga mas mapalambo ug mapaayo ang serbisyo niini ngadto sa mga tawo sa lalawigan.
Ang duha ka andana nga building nga nahimutang sa Osmeña Blvd, siyudad sa Sugbo, giinagurahan kagahapon sa pagpangulo ni Senador Richard ‘Dick’ Gordon, chairman ug chief executive officer sa PRC.
“With the newly renovated facility, the PRC is on track to do more, do better, and furthery enhance its services in Cebu,” matod sa senador kinsa niingon ang moderno nga establisemento nagsalamin sa panaad sa PRC nga ipadayon ang ilang serbisyo.
Sa iyang pakigpulong, si Gordon nisaad nga dugang blood centers ang ablihan sa nasod.
Matod niya, sobra sa 50 porsyento sa blood requirements sa nasod ang PRC tighatag.
Dinhi sa Sugbo, dugang mga buhatan ug blood banks ang tukoron diin ang labing bag-o ang sa dakbayan sa Bogo niadtong Disyembre sa miaging tuig.
Si Maria Vera De Jesus, chapter administrator sa PRC Cebu chapter, niingon nga nakig-estorya na sila sa kagamhanan sa siyudad sa Carcar ug makigsabot usab sila sa kagamhanan sa dakbayan sa Toledo alang sa posibleng pagpabarog og buhatan sa maong mga lugar.
Si Gordon niingon nga dapat gusto sa komunidad ug modonar usab og yuta ang LGU aron maoy pabarugan sa buhatan.
Ang P4.7 milyones nga building na-rehabilitate pinaagi sa suporta sa Japanese Red Cross Society, German Red Cross ug French Red Cross.
Ang unang andana sa edipisyo gipahiluna ang Eastern Visayas Regional Blood Center nga bukas tibuok oras samtang ang ikaduhang andana nahimutang ang administration office ug mga buhatan sa chapter services.