Inom sa convenience, sari-sari store idili unya sa Mandaue
Makabaligya apan di na tugutan nga makapainom og ilimnong makahubog gawas sa ilang establisemento ang mga convenience ug sari-sari store sa dakbayan sa Mandaue.
Kini kon hingpit na nga aprobahan sa konseho sa dakbayan ang ordinansa nga nag-regulate sa pagpamaligya sa ilimnong makahubog sa dakbayan.
Matod ni Atty. James Allan Sayson sa City Legal Office nga ubos sa proposed ordinance, ang mga establisemento kinahanglan na nga mokuha og lisensya sa pagpamaligya ug pag-serve sa ilimnong makahubog.
“…Convenience stores and sari-sari stores under the proposed ordinance will no longer be allowed to serve liquor. Meaning, wa nay inom sa Mandaue sa mga convenience stores. Mao na gireklamo ni mayor sa una kay diha magsugod ang gubot,” ni Sayson sa Superbalita Cebu.
Sayo ning semanaha, nihimo og public hearing ang city hall kalabot sa balaudnon nga mo-regulate sa pagpamaligya sa mga ilimnong makahubog.
Si Sayson nagkanayon nga maayo ang dagan sa public hearing niadtong Martes sa hapon.
Gani, daghang mga nisalmot niini gikan sa mga hugpong sa convenience stores, bars, sari-sari stores ug restaurants.
Gawas sa regulasyon sa pagpamaligya, laing ipatuman ubos sa ordinansahon mao nga di na makabaligya og ilimnong makahubog ang mga convenience stores gikan alas 12 sa tungang gabie hangtod alas 7 sa buntag.
“Di sila makabaligya from 12 midnight to alas 7 sa buntag. They are required to put a cover up sa ilang mga liquor nga display,” ni Sayson.
Dugang niya nga atol sa public hearing, ang mga convenience stores nihangyo nga imbes itom nga tela, ang itabon unya sa ilang refrigerator mao ang kaugalingon niining tabon nga ilang ipanaog kon oras na nga di tigbaligya ug ila kining papilitan sa kopya sa ordinansa.
“The public hearing went well. There were a lot of participants, more than what we expected but I think, they we’re able to voice out their sentiments also. Didto ra man mi naminaw sa ilang mga sentiment,” matod ni Sayson.
Laing yangungo sa mga partisipante mao ang regulatory fees nga wa pa mahibaw-i ang bayranan kon mokuha og lisensya ubos sa maong ordinansa.
Kon aprobahan sa ikatulo ug katapusang pagbasa, umolon sa City Hall ang Liquour Licensing Commission diin dinhi moagi ang tanang aplikasyon sa mga bar, restaurants, convenience ug sari-sari stores kon buot nilang mobaligya og ilimnon.